پشاور: صحافی کی فائرنگ سے ایک شہری جاں بحق، ڈاکٹر سمیت 3 افراد زخمی

پشاور (ڈیلی اردو) پشاور کے نواحی چمکنی میں مقامی اخبار کے صحافی نے شہری کو فائرنگ کر کے قتل کر دیا جبکہ ڈاکٹر اور بچے سمیت 3 افراد کو شدید زخمی کردیا۔ پولیس نے بروقت کارروائی کرتے ہوئے ملزم کو گرفتار کرلیا۔ گرفتار ملزم کچھ دنوں سے ذہنی دباؤ کا شکار تھا جسے گھر میں رسیوں سے باند رکھا گیا تھا۔ ایس ایچ او چمکنی حفیظ خان کے مطابق گزشتہ روز اطلاع ملی کہ پھندو میں مسلح شخص نے چلتی گاڑی پر فائرنگ کی ہے جس کے نتیجے میں ڈاکٹر شدید زخمی ہوا ہے جبکہ ملزم چمکنی کی طرف فرار ہوگیا ہے۔

اس دوران ملزم کا پیچھا کیاگیا تو راستے میں ملزم نے اپنی گاڑی سے شاہد ولد عبدالوحد سکنہ قدرہ خیل کو ٹکر ماری اور بعدازاں فائرنگ کر کے اسے قتل کردیا جس کے بعد ملزم نے ایک عینی شاہد شفیع اللہ ولد فضل محمد کوبھی فائرنگ کر کے شدید زخمی کر دیا۔ اس دوران ملزم کی گاڑی نالے میں جاگری اور فرار ہوتے وقت ملزم نے ایک بچے کو اٹھا کر زمین پر پٹک مارا اس دوران پولیس نے ملزم کو گرفتار کرلیا جس نے اپنا نام خان محمد بتایا کہ جو مقامی اخبار میں رپورٹر ہے ایس ایچ او کے مطابق مقدمہ درج کرکے مزید تفتیش شروع کر دی گئی ہے۔