پنڈی بھٹیاں: دو بھائیوں سے زیادتی اور قتل کے دو ملزمان پولیس مقابلہ میں ہلاک

پنڈی بھٹیاں (ڈیلی اردو) صوبہ پنجاب کے ضلع حافظ آباد کی تحصیل پنڈی بھٹیاں میں مبینہ پولیس مقابلے میں دو ملزمان مارے گئے ہیں، پولیس کا موقف ہے کہ ملزمان اپنے ساتھیوں کی فائرنگ سے مارے گئے ہیں۔

ترجمان پولیس کے مطابق گذشتہ رات چار ڈاکو پنڈی بھٹیاں کے علاقے جلالپور بھٹیاں میں جاوید نامی شخص سے موٹرسائیکل، نقدی، شناختی کارڈ وغیرہ چھین کر کسیسے کی طرف فرار ہوئے تھے، شہری کی ون فائیو پر کال کی، جس پر پولیس نے ناکہ بندی کر کے ملزمان کا تعاقب کیا تھا، تاہم ڈاکوؤ‌ں نے تھانہ کسیسے اور جلالپور بھٹیاں میں ناکہ توڑا اور پولیس پارٹی پر فائرنگ کی۔

پولیس کے مطابق پولیس کی بھاری نفری اور ایلیٹ فورس کے کمانڈوز نے ملزمان کا تعاقب جاری رکھا، ڈاکوؤں نے تعاقب کرنے والی پولیس پارٹی پر نسووال کے قریب دوبارہ فائرنگ کی اس دوران دو ملزمان اپنے ہی ساتھیوں کی فائرنگ سے مارے گئے جبکہ دو فرار ہونے میں کامیاب ہوگئے۔

مارے گئے ملزمان کی شناخت زوہیب اور حامد کے نام سے ہوئی، ملزمان جلالپور بھٹیاں میں دو سگے بھائیوں کے اغوا، زیادتی اور قتل میں ملوث تھے جبکہ فرار ہونے والے ملزمان کی گرفتاری کیلئے سرچ آپریشن جاری ہے۔