چینی شہریوں پر حملہ: طالبان حکومت نے تاجکستان کو مشترکہ تحقیقات کی پیشکش کردی

کابل (ڈیلی اردو/نیوز ایجنسیاں) افغانستان کی طالبان انتظامیہ نے منگل کے روز تاجکستان کو یقین دہانی کرائی ہے کہ وہ سرحدی سکیورٹی مزید سخت کرنے اور حالیہ حملوں کی مشترکہ تحقیقات کے لیے تیار ہے۔ یہ وہ حملے ہیں، جن کے بارے میں دوشنبے حکومت کا کہنا ہے کہ وہ افغان سرزمین سے کیے گئے اور ان میں گزشتہ ہفتے پانچ چینی شہری مارے گئے۔

افغان وزیرِ خارجہ امیر خان متقی نے اپنے تاجک ہم منصب سے گفتگو میں افسوس کا اظہار کرتے ہوئے کہا کہ کابل سرحدی فورسز کے درمیان رابطے بڑھانے کے لیے تیار ہے اور ’’شرپسند عناصر کے خلاف مشترکہ اقدامات اب ناگزیر ہیں۔‘‘ 

افغان وزارتِ خارجہ کے مطابق متقی نے کہا، ’’اسلامی امارت ہر طرح کی رابطہ کاری، سرحدی سکیورٹی مضبوط کرنے اور مشترکہ تحقیقات کے لیے مکمل طور پر تیار ہے۔‘‘ انہوں نے مزید کہا کہ دونوں ملکوں کے درمیان حالیہ عرصے میں ’’اعتماد کا ماحول‘‘ قائم ہوا ہے، جسے خراب نہیں ہونا چاہیے۔

تاجک حکام نے پیر کو بتایا تھا کہ سرحد پار سے کیے گئے دو حملوں میں سے ایک میں ڈرون کے ذریعے گرینیڈ گرائے گئے، جن میں پانچ چینی کارکن  زخمی بھی ہوئے۔ چین کے سفارتخانے نے ہلاکتوں کی تصدیق کرتے ہوئے اپنے شہریوں کو سرحدی علاقے سے نکلنے کی ہدایت کی ہے۔

تاجک صدر امام علی رحمان نے ان واقعات کے بعد سرحدی نگرانی مزید سخت کرنے کے احکامات دیے ہیں۔ یہ حملے دونوں ملکوں کی دشوار گزار پہاڑی سرحد کے قریب رونما ہوئے۔ چین نے  تقریباً ایک کروڑ 10 لاکھ  آبادی والے اور روس کے ایک بڑے اتحادی ملک تاجکستان میں بڑے پیمانے پر سرمایہ کاری کر رکھی ہے۔