ڈیرہ اسماعیل خان میں دہشت گردوں کی فائرنگ سے ایڈیشنل ایس ایچ او ہلاک

ڈی آئی خان (بیورو رپورٹ) صوبہ خیبر پختونخوا کے ضلع ڈیرہ اسماعیل خان میں پولیس موبائل پر دہشت گردوں کے حملے میں ایڈیشنل ایس ایچ او دین محمد ہلاک ہوگئے۔

پولیس کے مطابق دہشت گردوں نے دراندازہ کے قریب پولیس موبائل پر حملہ کیا، اس دوران دہشت گردوں کی فائرنگ سے ایڈیشنل ایس ایچ او دین محمد شیرانی موقع پر ہلاک ہوگئے۔

پولیس کا کہنا ہے کہ واقعے کی اطلاع ملتے ہی پولیس، سکیورٹی فورسز اور شیرانی قبائل کے ہاتھوں 3 دہشت گرد مارے گئے۔

فائرنگ کے نتیجے میں 2 دہشت گرد زخمی بھی ہوئے، دہشت گردوں نے فرار کی کوشش میں دستی بم کا بھی استعمال کیا۔

درہ زندہ میں شیرانی قبیلے کے غیور عوام قانون نافذ کرنے والے اداروں کے شانہ بشانہ دہشتگردوں کے خلاف صف آراء ہوگئے۔

دہشت گردوں کے حملے کے نتیجے میں علاقہ کے عوام موقع پر جمع ہو گئے اور سیکورٹی فورسز کے ہمراہ دہشتگردوں کا گھیراؤ کیا اور تینوں دہشت گردوں کو مار دیا گیا۔

عوام کا کہنا ہے کہ ہم ہمیشہ دہشتگردی کے خلاف عملی طور پر پاک فوج کے شانہ بشانہ کھڑے رہیں گے۔

انھوں نے مزید کہا کہ دہشت گردوں کے خلاف پاکستان کی سر زمین کے لیے ہر قسم کی قربانی دینے کو تیار ہیں۔

واضح رہے کہ اس سے پہلے لکی مروت کے عوام نے بھی ہمیشہ دہشتگردوں کے خلاف فوج کے شانہ بشانہ لڑائی کی۔

عوام کا کہنا ہے کہ نہتے عوام کو نشانہ بنانے والے اور بھتہ خوری کرنے والے خوارج کا وجود ہر گز برداشت نہیں کریں گے۔

عوام نے عہد کیا کہ علاقے کے امن کیلئے سیکیورٹی اداروں کے ساتھ مل کر ہر حد تک جائیں گے۔