اسرائیل نے باقاعدہ طور پر سوڈان کی فضائی حدود استعمال کرنا شروع کر دی

مقبوضہ بیت المقدس (ڈیلی اردو) اسرائیلی حکومت نے کہا ہے کہ صہیونی ریاست کی فضائی کمپنیوں‌ نے سوڈان کی فضائی حدود کا باقاعدہ استعمال شروع کردیا ہے۔ اسرائیلی حکام کا کہنا ہے کہ سوڈان کی فضائی حدود استعمال کرنے کی پوری آزادی حاصل ہے اور کسی قسم کی روک تھام نہیں‌ ہے۔

عبرانی اخبار ‘یدیعوت احرونوت’ کے مطابق اسرائیل کی فضائی کمپنیوں نے سوڈان کی فضائی حدود استعمال کرنا شروع کردی ہے۔ انہوں‌نے سوڈان کی خود مختار کونسل کا فضائی حدود استعمال کرنے کی اجازت دینے پر شکریہ ادا کیا۔

خیال رہے کہ یہ پہلا موقع ہے کہ سوڈان نے صہیونی ریاست کو اپنی فضائی حدود کے استعمال کی اجازت دی ہے۔

یہ پیش رفت حال ہی میں سوڈان کی خود مختار کونسل کے سربراہ جنرل عبدالفتاح البرھان کی یوگنڈا میں اسرائیلی وزیراعظم بنجمن نیتن یاھو کے ساتھ ملاقات کے بعد عمل میں لائی گئی ہے۔