فرانسیسی جنگی بیڑے چارلس ڈیگال پر کورونا وائرس کا حملہ، 40 اہلکار متاثر، 3 حالت تشویشناک

پیرس (ڈیلی اردو) فرانسیسی طیارہ بردار جہاز چارلس ڈیگال کے عملے میں کورونا وائرس پھیل گیا ہے۔ فرانسیسی حکام کے مطابق عملے کے 40 افراد میں وائرس کی تصدیق ہو گئی ہے۔ جبکہ تین افراد کی حالت تشویشناک بتائی جاتی ہے۔

تفصیلات کے مطابق فرانسیسی طیارہ برادر جہاز کے تین ملاحوں کو تشویشناک حالت میں ہیلی کاپٹر کے ذریعے قریبی شہر کے ہسپتال پہنچا دیا گیا ہے جبکہ طیارہ بردار جہازکے دیگر عملے کا ٹیسٹ لینے کا عمل جاری ہے۔

فرانسیسی وزارت خارجہ کی جانب سے جاری بیان میں کہا گیا ہے کہ جہاز میں فوجی اہلکاروں اور عملے کے ارکان سمیت 1760 افراد موجود ہیں، جن کو آئی سی یو سمیت تمام طبی سہولیات جہاز کے اندر ہی میسر ہیں۔

Coronavirus alert on French Navy’s flagship aircraft carrier amid fears 40 sailors have the bug https://t.co/BugrdHj0NQ

— Daily Mail Online (@MailOnline) April 8, 2020

یاد رہے کہ اس سے قبل امریکا کے بحری بیڑے روزویلٹ کے کپتان نے محکمۂ دفاع پینٹاگون کو لکھے گئے خط میں تشویش کا اظہار کیا ہے کہ کورونا وائرس سے بیڑے پر موجود اہلکاروں کی زندگیوں کو خطرہ ہے اس لیے فوری طور پر مدد کی جائے۔

جس کے بعد امریکی بحریہ جوہری ہتھیاروں سے لیس روزویلٹ نامی بحری بیڑے سے ہزاروں اہلکاروں کو نکالنے کا کام شروع کیا گیا ۔ جبکہ سو سے زائد افراد میں کورونا وائرس کی تصدیق ہوئی تھی ۔

خبر رساں ادارے اے ایف پی کے مطابق روزویلٹ نامی بحری بیڑہ امریکا کے زیرِ انتظام جزیرے گوام کے قریب موجود ہے۔ امریکی بحریہ کے مطابق بیڑے پر 4800 افراد کا عملہ تعینات تھا۔

خبر رساں ادارے کے مطابق اب تک بیڑے سے ایک ہزار اہلکاروں کو نکالا جا چکا ہے جن میں سے 93 افراد میں کرونا وائرس کی تصدیق ہوئی ہے۔

پیٹاگون کے حکام کا کہنا ہے کہ روزویلٹ کے عملے کے لیے فوری طور پر ہوٹلوں میں کمروں کا انتظام کر رہے ہیں جبکہ کچھ صحت مند اہلکاروں کو بیڑے پر ہی تعینات رکھا جائے گا تاکہ وہ معمول کے کام جاری رکھ سکیں۔