مفتی شہاب الدین پوپلزئی کو چاند نظر آگیا، پشاور سمیت دیگر اضلاع میں آج پہلا روزہ رکھنے کا اعلان

پشاور (ڈیلی اردو) ملک میں ایک ہی دن روزے کا خواب پھر پورا نہ ہوسکا، پشاور سمیت صوبہ کے کئی علاقوں میں رمضان المبارک کے چاند کی شہادتیں موصول ہونے پر آج بروز جمعہ یکم رمضان المبارک کا اعلان کردیا گیا۔

اہم خبر

تمام گواہان کی گواہی کو شرعی میزان پر تولنے کے بعد صوبہ خیبر پختونخواہ کے رویت ہلال کمیٹی نے کل بروز جمعہ المبارک کو یکم رمضان کا اعلان کیا ہے۔ ان شاء اللہ کل پہلا روزہ ہوگا
آپ سب کو میری طرف سے رمضان کے یہ مقدس لمحات بہت بہت مبارک ہو

بندہ عاجز مفتی شہاب الدین پوپلزئی

— Mufti Shahabuddin Popalzai (@MuftiPopalzai) April 23, 2020

پشاور میں مسجد قاسم علی خان میں مقامی رویت ہلال کمیٹی کا اجلاس مفتی شہاب الدین پوپلزئی کی سربراہی میں منعقد ہوا جس میں مقامی علمائے کرام نے بھی شرکت کی جبکہ 17 علمائے کرام کے ساتھ فون پر رابطوں کے لیے بھی نمبر جاری کیے گئے تھے۔

بعدازاں کمیٹی کو شہادتیں موصول ہوئیں جس کے بعد مفتی شہاب الدین نے باقاعدہ طورپر چاند نظر آنے کا اعلان کردیا جس کے بعد آج پشاور سمیت صوبہ کے دیگر کئی علاقوں میں پہلا روزہ رکھا جائے گا۔