نائیجیریا میں مسلح افراد کا گاؤں پر حملہ، 12 افراد ہلاک

ابوجا (ڈیلی اردو) شمالی نائیجریا کی ریاست پلاٹیو میں کاشتکار اور چرواہا قبائلی تکرار، مسلح افراد کے گاؤں پر حملے کے نتیجے میں 12 افراد ہلاک ہوگئے۔

غیر ملکی میڈیا کے مطابق مقامی افراد کا کہنا ہے کہ کاشتکار قبیلے کے مسلح افراد نے شام کے وقت چرواہوں کے میکاٹاکو گاؤں پر حملہ کر کے 12 افراد کو قتل کر دیا ہے۔

ریاست پلاٹیو کے گورنر کا کہنا ہے کہ حالیہ دنوں میں کاشتکار اور چرواہا قبائل کے درمیان کشیدگی شدت اختیار کر گئی ہے اور دونوں جانب سے ایک دوسرے پر کیے جانے والے حملوں، کھیتوں کو جلانے، مویشیوں کو مارنے اور ایک دوسرے کی املاک کو تباہ کرنے جیسے واقعات میں دن بہ دن اضافہ تشویشناک امر ہے۔

پلاٹیو کے گورنر نے تصدیق کی کہ کاشتکار قبیلے کے مسلح افراد کی جانب سے چرواہا قبیلے کے ایک گاؤں پر کیے گئے حملے میں 12 افراد ہلاک ہوگئے ہیں۔

واضح رہے کہ کینیا کے شمالی ریاست پلاٹیو میں زمینوں کو زراعت کیلئے استعمال کرنے کیلئے کاشتکار قبائل کی جانب زرعی اراضی میں توسیع کی کوششوں کو چرواہا قبیلوں کی جانب سے چراگاہوں پر قبضے کی کوشش قرار دے کر رد کر دیا گیا تھا۔

زمین کی ملکیت کے معاملے پر دونوں قبائل کے درمیان پیدا ہونے والا تناؤ دن بہ دن شدت اختیار کرتا جا رہا ہے، اب تک دونوں گروہوں جانب سے ایک دوسرے پر کیے گئے حملوں میں سیکڑوں افراد جان کی بازی ہار چکے ہیں جبکہ ایک دوسرے کی املاک کو بھی بھاری نقصان پہنچایا جا چکا ہے۔