پاکستان میں کورونا وائرس سے ایک دن میں 21 ہلاکتیں، مجموعی تعداد 166 ہوگئی

پشاور (ڈیلی اردو) ملک بھر میں گزشتہ چوبیس گھنٹوں میں کورونا وائرس سے مزید 21 افراد جاں بحق ہوگئے ہیں۔ جس کے بعد وائرس سے جاں بحق افراد کی تعداد 166 ہوگئی ہے۔

ملک میں ہونے والی 166 ہلاکتوں میں سے سب سے زیادہ 60 ہلاکتیں خیبرپختونخوا میں ہوئی ہیں جبکہ سندھ میں 55، پنجاب 41، بلوچستان 5، گلگت 3 اور اسلام آباد میں 2 ہلاکت ہوچکی ہے۔

اعداد و شمار کے مطابق پنجاب میں سب سے زیادہ 3649 اور سندھ میں 2355 کیسز رپورٹ ہوئے ہیں۔ اس کے علاوہ خیبر پختونخوا میں 1137، بلوچستان میں 376، گلگت بلتستان میں 257، آزاد کشمیر 48 جب کہ اسلام آباد سے 171 کیسز رپورٹ ہوئے ہیں۔

خیبرپختونخوا میں کورونا وائرس سے مزید 10 اموات ہوئی ہیں جو کہ ایک دن میں صوبے میں اموات کی اب تک سب سے بڑی تعداد ہے۔

حکومتی اعداد و شمار کے مطابق 18 اپریل کو خیبرپختونخوا میں کورونا کے مزید 60 کیسز سامنے آئے ہیں جس کے ساتھ مجموعی تعداد 1137 ہوگئی ہے۔ صوبے میں اب تک 226 مریض صحتیاب ہوچکے ہیں۔

خیبر پختونخوا کے اعداد و شمار کے ساتھ ملک بھر میں کورونا متاثرین کی مجموعی تعداد 7993 ہوگئی ہے جبکہ اموات بھی 166 تک پہنچ گئی ہیں۔ ملک بھر میں اس وائرس سے صحتیاب ہونے والوں کی تعداد 1868 ہے۔