پاکستان نے فوجی سربراہ کی تاحیات مراعات پر اقوام متحدہ کا بیان مسترد کر دیا

اسلام آباد (ڈیلی اردو) پاکستان نے اقوام متحدہ کے انسانی حقوق کے سربراہ کے اس انتباہ کو مسترد کر دیا کہ طاقتور فوج کے سربراہ کو قانونی استثنیٰ دینے سے قانون کی بالادستی پر ’’دور رس اثرات‘‘ مرتب ہو سکتے ہیں۔

وزارت خارجہ نے کہا کہ پاکستان ’’آئین میں درج بنیادی آزادیوں اور قانون کی بالادستی کے تحفظ کے لیے پوری طرح پرعزم ہے۔‘‘ یہ بیان اقوام متحدہ کے انسانی حقوق کے ہائی کمشنر وولکر ترک کے ریمارکس کے جواب میں جاری کیا گیا۔

رواں ماہ کے شروع میں پارلیمان سے منظور کی جانے والی آئینی ترمیم کے تحت فیلڈ مارشل عاصم منیر کو قانونی تعاقب سے تاحیات استثنیٰ دے دیا گیا ہے، جس پر انسانی حقوق کے گروپوں نے شدید تشویش ظاہر کی ہے۔

اس ترمیم سے ایک نئی وفاقی آئینی عدالت بھی قائم کی گئی ہے، جس کے نتیجے میں سپریم کورٹ کے کچھ اختیارات کم ہو گئے ہیں اور ججوں پر نگرانی سخت کر دی گئی ہے۔

وولکر ترک نے جمعے کو جاری کردہ اپنے بیان میں کہا تھا کہ ’’یہ تبدیلیاں مل کر عدالتوں کو سیاسی مداخلت اور ایگزیکٹو کنٹرول کے تابع کر دینے کا خطرہ رکھتی ہیں۔‘‘

 انہوں نے خبردار کیا کہ اس سے ’’جمہوریت اور قانون کی بالادستی کے ان اصولوں پر دور رس اثرات پڑ سکتے ہیں، جنہیں پاکستانی عوام قدر کی نگاہ سے دیکھتے ہیں۔‘‘

اسلام آباد میں وزارت خارجہ نے اتوار کو جاری کردہ بیان میں ان ریمارکس کو ’’بے بنیاد‘‘ قرار دیا اور کہا کہ ’’یہ افسوسناک ہے کہ پاکستان کے نقطہ نظر اور زمینی حقائق کو نظر انداز کیا گیا۔‘‘

ایٹمی ہتھیاروں سے لیس 25 کروڑ سے زائد آبادی والا پاکستان طویل عرصے سے سویلین اتھارٹی اور فوج کے سیاسی کردار کے درمیان توازن قائم کرنے کے لیے جدوجہد کرتا رہا ہے۔

سن 1947 میں آزادی کے بعد سے پاکستانی فوج نے کئی بار بزور طاقت اقتدار سنبھالا اور ملک کے نصف سے زائد عرصے تک براہ راست حکومت کی۔ فوج کو عمومی طور پر پاکستان کا سب سے طاقتور ادارہ سمجھا جاتا ہے۔