کررونا وائرس: ورلڈ بینک کی پاکستان کیلئے مزید 200 ملین ڈالر کی امداد

واشنگٹن (ڈیلی اردو) ورلڈ بینک نے پاکستان کے لیے مزید 200 ملین ڈالر کے پیکیج کی منظوری دیدی ہے۔

تفصیلات کے مطابق ورلڈ بینک کے بورڈ آف ایگزیکٹو ڈائریکٹرز نے پاکستان کے لیے مزید 200 ملین ڈالر کے پیکیج کی منظوری دیدی ہے جو کورونا وبا سے نمٹنے، صحت کے نظام کو تقویت دینے اور سماجی و اقتصادی مسائل کے حل پر استعمال کیا جائے گا۔ اس کے علاوہ ضروری طبی سامان کی فراہمی کے 8 جاری منصوبوں سے 38 ملین ڈالر کی اضافی رقم بھی حاصل کی جائے گی۔

کنٹری ڈائریکٹر ورلڈ بینک کا کہنا ہے کہ کورونا وائرس کے خلاف لڑنے کے لئے پاکستان کی مدد میں اضافہ کر رہے ہیں، پریپ منصوبہ کورونا کا پتہ لگانے اور نگرانی کرنے کی صلاحیت کو مستحکم کرنے میں مدد کرے گا جب کہ غریبوں کو نقد رقم کی منتقلی میں مدد کے لئے وسائل بھی فراہم کرے گا، اس کے علاوہ پریپ سرکاری اور نجی ہسپتالوں میں وینٹیلیٹر اور پیرا میڈیکس کو ذاتی تحفظ کا سازو سامان بھی فراہم کرے گا۔