اسلام آباد (ڈیلی اردو) احتساب عدالت نے ایل این جی کیس میں گرفتار سابق وزیراعظم شاہد خاقان عباسی کا مزید 14 روزہ ریمانڈ منظور کرتے ہوئے انہیں 29 اگست کو دوبارہ عدالت میں پیش کرنے کا حکم دیا ہے۔
تفصیلات کے مطابق نیب کی ٹیم نے ایل این جی اسکینڈل میں گرفتار سابق وزیراعظم شاہد خاقان عباسی کو ریمانڈ مکمل ہونے احتساب عدالت میں پیش کیا، اس موقع پر سیکیورٹی کے سخت انتظامات کئے گئے تھے۔
دوران سماعت جج محمد بشیر نے نیب پراسیکیوٹر سے استفسار کیا کہ مزید کتنا ریمانڈ چاہیے، نیب پراسیکیوٹر نے استدعا ہے کہ چودہ روز کا مزید ریمانڈ چاہئے، جس پر شاہد خاقان عباسی نے کہا کہ جتنا چاہتے ہیں ریمانڈ دے دیں، دوران تفتیش دستاویزات مانگ لیتے ہیں، جو سوالات پوچھ لیتے ہیں،ان کاجواب دے دیتا ہوں۔
سماعت کے موقع پر معززجج محمد بشیر نے کہا کہ 14 روز کا ریمانڈ دے دیتا ہوں، تفتیش مکمل کرنے کی کوشش کریں۔ بعد ازاں نیب کورٹ اسلام آباد نے شاہد خاقان عباسی کاچودہ روزہ ریمانڈ منظور کرتے ہوئے سابق وزیراعظم کو 29 اگست کو دوبارہ پیش کرنے کا حکم دیا۔
اس سے قبل کمرہ عدالت میں شاہد خاقان عباسی سے خواجہ آصف، مریم اورنگزیب اور مصدق ملک نے ملاقات کی تھی۔
یاد رہے اٹھارہ جولائی کو قومی احتساب بیورو نے مسلم لیگ ن کے رہنما اور سابق وزیراعظم شاہد خاقان عباسی کو گرفتار کیا تھا، نیب نے شاہد خاقان عباسی کو ایل این جی کیس میں طلب کر رکھا تھا لیکن انہوں نے نیب میں پیش نہ ہونے کا فیصلہ کیا تھا۔
بعد ازاں احتساب عدالت نے ایل این جی کیس میں گرفتار مسلم لیگ (ن) کے رہنما و سابق وزیراعظم شاہد خاقان عباسی کو تیرہ روزہ جسمانی ریمانڈ پر نیب کے حوالے کردیا تھا۔
