کابل (ڈیلی اردو/نیوز ایجنسی) صدر اشرف غنی نے افغانستان میں عالمی دہشت گرد تنظیم داعش کے ٹھکانوں کو نشانہ بنانے کا اعلان کیا ہے۔
بین الاقوامی خبر رساں ادارے کے مطابق افغان صدر اشرف غنی نے افغانستان کی آزادی کی سو سالہ تقریب سے خطاب کرتے ہوئے کہا کہ اْن کا ملک داعش کے ٹھکانوں کا صفایا کر کے چھوڑے گا۔
معصوم بچوں اور خواتین کو قتل کرنے والوں کو کسی صورت معاف نہیں کیا جائے گا۔ افغان صدر نے کہا کہ شادی کی تقریب میں خود کش حملے میں 63 افراد کی شہادت پر ہر شہری دل گرفتہ ہے۔
انہوں نے کہا کہ دہشت گردی کے خلاف جنگ میں کامیابی ہمارا مقصد ہوگی اور اس واقعے کے بعد سے سو سالہ آزادی کی تقریبات ماند پڑگئی ہیں۔ شہدا کے لواحقین سے اظہار یکجہتی کے لیے تمام تقریبات معطل کرنے کا اعلان کرتا ہوں۔
واضح رہے کہ کابل میں شیعہ ہزارہ برادری کی شادی کی تقریب میں خود کش حملے میں 63 افراد شہید اور 183 افراد زخمی ہوگئے تھے جس کی ذمہ داری عالمی دہشت گرد تنظیم داعش کے مقامی قیادت نے قبول کی تھی۔
