206

وزیراعظم عمران خان نے سانحہ ساہیوال پر جوڈیشل کمیشن بنانے کا عندیہ دے دیا

لاہور ( ڈیلی اردو) وزیراعظم عمران خان نے وزیراعلیٰ پنجاب کو سانحہ ساہیوال کے متاثرین سے ملاقات کی ہدایت کردی، وزیراعظم نے کہا کہ سانحہ ساہیوال کے متاثرین کی خواہشات کے مطابق تحقیقات کی جائیں، اگر جوڈیشل کمیشن بنانا پڑے تو غور کیا جائے۔ وزیراعظم عمران خان نے آج لاہور کا ایک روزہ دورہ کیا۔ وزیراعظم عمران خان سے وزیراعلیٰ پنجاب عثمان بزدار نے ملاقات بھی کی۔

جس میں وزیراعلیٰ نے وزیراعظم کو صوبے میں اتحادی حکومت کے معاملات اور عوامی مسائل کے حل کیلئے کارکردگی سمیت سانحہ ساہیوال کی تحقیقات میں ہونے والی پیشرفت سے آگاہ کیا۔ وزیراعظم عمران خان نے وزیراعلیٰ عثمان بزدار کو ہدایت کی ہے کہ فوری طور پر سانحہ ساہیوال کے متاثرین سے ملاقات کریں۔ ذرائع کا کہنا تھا کہ وزیراعظم عمران خان نے سانحہ ساہیوال پر جوڈیشل کمیشن بنانے کا بھی عندیہ دیدیا ہے وزیراعظم نے کہا کہ متاثرہ فیملی کی بات سنی جائے، متاثرہ فیملی جوڈیشل کمیشن پر مطمئن یوتی ہے تو اس پر غور کیا جائے۔

جس پر وزیراعلیٰ پنجاب عثمان بزدار کل بروز سوموار کو متاثرین سے ملاقات کرکے سانحہ ساہیوال کی تحقیقات میں ہونے والی پیشرفت سے آگاہ کریں گے۔

وزیراعظم عمران خان نے کہا کہ سانحہ ساہیوال کے متاثرین کی تحقیقات سے متعلق خواہش کے مطابق عمل کیا جائے۔ متاثرین اگر چاہتے ہیں کہ جوڈیشل کمیشن بنایا جائے تو اس پر بھی غور کیا جائے۔ مزید برآں وزیراعظم عمران خان کی زیرصدارت ایوان وزیراعلیٰ میں ہونے والے اعلیٰ سطحی اجلاس میں صوبائی کابینہ کے اراکین، وزیراعلی پنجاب عثمان بزدار اور گورنر پنجاب چوہدری محمد سرور سمیت دیگر اعلی حکام نے شرکت کی۔ اجلاس کے دوران وزیراعظم نے گیس کی قیمتوں میں اضافے کا نوٹس لیتے ہوئے وزیر پیٹرولیم کو فوری طور پر انکوائری کی ہدایت کی۔

انہوں نے کہا کہ گھریلو صارفین پر اضافی بوجھ ڈالنا غیرمناسب ہے۔ وزارت پٹرولیم وگیس اس پر جواب دے کہ گھریلو صارفین کے لئے گیس بلوں میں اضافہ کیوں کیا گیا۔ انہوں نے اس حوالے سے وزیر پیٹرولیم کو فوری طور پر انکوائری کی ہدایت بھی کی. وزیر اعظم کو پولیس اصلاحات سے متعلق بریفنگ بھی دی گئی، وزیر اعظم سے صوبائی پارٹی رہنما بھی ملاقات کریں گے۔

اس خبر پر اپنی رائے کا اظہار کریں

اپنا تبصرہ بھیجیں