406

کراچی میں سی ٹی ڈی کی بڑی کارروائی، لشکر جھنگوی کے 5 دہشت گرد گرفتار

کراچی (ط ع ش) صوبہ سندھ کے صوبائی حکومت کراچی میں کاؤنٹر ٹیررازم ڈیپارٹمنٹ نے بڑی کارروائی کرتے ہوئے کالعدم تنظیم لشکر جھنگوی کے پانچ دہشت گردوں کو گرفتار کر لیا۔

انچارج سی ٹی ڈی علی رضا کے مطابق منگل اور بدھ کی درمیانی شب اطلاع ملی کہ کالعدم تنظیم لشکر جھنگوی کے دہشت گرد بڑی کارروائی کے لئے گولیمار کے علاقے میں موجود ہیں۔ سی ٹی ڈی پولیس نے چھاپہ مار کر 5 دہشت گردوں کو گرفتار کر کے ان کے قبضے سے 4 عدد پسٹل، ایک کلاشنکوف اور سیکڑوں گولیاں برآمد کرلیں۔ گرفتار دہشت گردوں میں کاظم علی شاہ عرف شاہ جی، محمد ثاقب اختر، عبدالرحمن عرف زبیر، عمیر عرف خلیل اور شہاب عرف چھوٹا عرف صفدر شامل ہیں۔

علی رضا کے مطابق ملزمان نے دوران تفتیش انکشاف کیا کہ انہوں نے فرقہ وارانہ بنیادوں پر ٹارگٹ کلنگ کی 6 سے زائد وارداتیں کی ہیں۔ انہیں شہر کا امن و امان خراب کرنے کے لیے جیل میں قید کالعدم لشکر جھنگوی کے دہشت گرد قاسم رشید اور وسیم بارودی ہدایت دیتے تھے کہ کس دن کسے قتل کرنا ہے۔

گرفتار دہشت گردوں نے بتایا کہ حال ہی میں ٹارگٹ کلنگ کی 4 ٹیمیں بنائی گئیں ہیں، یہ چاروں ٹیمیں ایک دوسرے کے رابطے میں نہیں ہیں۔ چاروں ٹیموں کو جیل سے ہدایت ملتی ہیں اور اس کے مطابق کارروائیاں کی جاتی ہیں۔

سی ٹی ڈی کے افسر کا کہنا ہے کہ گروپ کے دہشت گرد موبائل فون سمیت کسی بھی ٹیکنالوجی کا استعمال نہیں کرتے۔ ملزمان جس گھر میں ٹھہرے ہوئے تھے وہاں سے ایک ہٹ لسٹ بھی ملی ہے۔ گرفتار دہشت گرد قانون نافذ کرنے والے اداروں کے اہلکاروں اور فرقہ وارانہ شیعہ ٹارگٹ کلنگ کا منصوبہ بنایا ہوا تھا۔

سی ٹی ڈی پولیس کا کہنا ہے زیر حراست دہشت گردوں کے ساتھیوں کی گرفتاری کے لیے گھیرا مزید تنگ کردیا ہے اور مختلف مقامات پر چھاپے مارے جارہے ہیں۔

ایڈیشنل آئی جی سی ٹی ڈی ڈاکٹر جمیل نے پولیس پارٹی کو اچھی کارگردگی پر نقد انعام اور اسناد دینے کا اعلان کیا ہے۔

اس خبر پر اپنی رائے کا اظہار کریں

اپنا تبصرہ بھیجیں