غزہ (ڈیلی اردو) غزہ کی پٹی سے سرحد کی دوسری طرف قائم اسرائیلی کالونیوں پر راکٹ حملوں اور آتش گیر غباروں کے دوبارہ حملوں کے بعد اسرائیل نے جوابی کارروائی کرتے ہوئے غزہ میں اسلامی تحریک مزاحمت ‘حماس’ کے ٹھکانوں پر زمینی اور فضائی حملے کیے ہیں۔
خیال رہے کہ حالیہ ایام میں جنوبی غزہ سے اسرائیل پر آتش گیر مواد سے بھرپور غبارے پھینکے گئے جس کے نتیجے میں عبرانی ریاست کے علاقوں میں آگ بھڑک اٹھی۔
اسرائیلی فوج نے جوابی کارروائی کرتے ہوئے غزہ میں حماس کے ٹھکانوں پر زمینی اور فضائی حملے کیے ہیں تاہم ان حملوں میں کسی قسم کے جانی نقصان کی اطلاع نہیں ملی۔
اسرائیلی فوج کی طرف سے جاری ایک بیان میں کہا گیا ہے کہ جنگی طیاروں، فوجی ہیلی کاپٹروں اور ٹینکوں کی مدد سے غزہ میں حماس کے نیول ڈیفنس سسٹم اور دیگر تنصیبات کو نشانہ بنایا گیا ہے۔ بیان میں کہا گیا ہے کہ یہ کارروائی غزہ کی پٹی سے آتش گیر غبارے چھوڑے جانے پر اسرائیل کا رد عمل ہے۔
ادھر فلسطینی ہلال احمر کے مطابق اسرائیلی طیاروں کی بمباری سے غزہ میں ایک حملہ خاتون اور ایک تین سالہ بچہ زخمی ہوئے ہیں جنہیں اسپتال منتقل کیا گیا ہے۔
