یورپی ممالک شام میں گرفتار اپنے جنگجو شہریوں کو تحویل میں لیں: امریکی صدر

واشنگٹن (ویب ڈیسک) امریکی صدر ڈونلڈ ٹرمپ نے یورپی ممالک کو متنبہ کیا ہے کہ شام میں گرفتار اپنے داعش جنگجو شہریوں کو تحویل میں لے کر اپنی سرزمین پر ہی سزا دیں ورنہ بڑی تباہی کے لیے تیار رہیں۔

امریکی صدر ڈونلڈ ٹرمپ نے سماجی رابطے کی ویب سائٹ ٹویٹر پر اپنی ایک ٹویٹ میں کہا ہے کہ شام میں 800 سے زائد ایسے داعش دہشت گرد گرفتار ہیں جو برطانیہ، فرانس اور جرمنی کی شہری ہیں۔ یہ ممالک ان جنگجوؤں کو اپنی تحویل میں لے کر اپنی ہی سرزمین پر ٹرائل کریں۔

امریکی صدر نے مزید کہا کہ شام سے شدت پسند تنظیم داعش کا جلد مکمل خاتمہ ہو جائے گا تاہم شام کی مختلف جیلوں میں اسیر یورپی ممالک سے تعلق رکھنے والے 800 جنگجو ایک بڑا خطرہ ہیں اور اگر یہ رہا ہوگئے تو خود ان ممالک کی سرزمین کے لیے بھی ایک مستقل خطرہ بن جائیں گے۔

شام میں داعش کے خلاف حتمی جنگ جاری ہے، شام کے کچھ ہی حصے پر قابض داعش جنگجوؤں کا زور اب ٹوٹ رہا ہے اور امریکا بھی شام سے اپنی فوجیں واپس بلانے کا عندیہ دے چکا ہے۔ یورپی ممالک سے تعلق رکھنے والے اسیر داعش جنگجو امریکی حمایت یافتہ سیریئن ڈیموکریٹک فورسز کے قبضے میں ہیں۔

Facebook Notice for EU! You need to login to view and post FB Comments!

اس خبر پر اپنی رائے کا اظہار کریں

اپنا تبصرہ بھیجیں