کراچی (ڈیلی اردو) صوبہ سندھ کے صوبائی دارالحکومت کراچی کے علاقے نیپئر پیتل داس کمپاؤنڈ کے قریب پراسرار دھماکے میں دو نوجوان زخمی ہوئے جنہیں طبی امداد کیلئے سول ہسپتال منتقل کیا گیا۔
پولیس کے مطابق نیپیئر تھانے کے علاقے میں واقع پولیس کوارٹرز پیتل داس کمپاؤنڈ کے قریب پراسرار دھماکے میں 2 نوجوان زخمی ہوگئے جنہیں فوری طور پر سول ہسپتال منتقل کردیا گیا زخمی نوجوانوں میں 22 سالہ بابر اور21 سالہ دانیال کو گردن اور سینے پر زخم آئے۔
پولیس کے مطابق دھماکے کے وقت زخمی نوجوان آگ جلا کر ہاتھ سیک رہے تھے، اسی دوران دھماکا ہوا۔
زخمی ایک نوجوان پولیس اہلکار کا بیٹا ہے۔ پرسرار دھماکے کی اطلاع ملتے ہی ایس ایس پی سٹی سرفراز نواز اور دیگر پولیس و رینجرز اہلکار موقع پر پہنچ گئے جبکہ بم ڈسپوزل اسکواڈ کےعملے کو بھی طلب کرلیا گیا۔
اس حوالے سے ایس ایس پی سٹی سرفراز نواز نے بتایا کہ زخمی نوجوان محلے میں آگ جلا کر ہاتھ تاپ رہے تھے کہ اسی دوران انھوں نے کوئی چیز اٹھائی جو دھماکے سے پھٹ گئی۔
بم ڈسپوزل اسکواڈ کا عملہ شواہد اکٹھا کر رہا ہے جس کی ٹیم علاقے کو کلیئر کرکے بتائے گئی کہ دھماکہ کس چیز کا ہے، پولیس موقع پر موجود ہے اور عینی شاہدین سے معلومات اکٹھا کرنے کی کوشش کر رہی ہے۔
