لاہور (اے ڈی شہزاد) کاؤنٹر ٹیریرزم ڈیپارٹمنٹ (سی ٹی ڈی) نے لاہور میں بڑی کارروائی کرتے ہوئے کالعدم تنظیم القاعدہ کے دو دہشت گردوں گرفتار کرلیا ہے۔ دہشت گردوں نے عاشورہ پر تخریب کاری کا منصوبہ بنا رکھا تھا۔
ترجمان سی ٹی ڈی کے مطابق گرفتار دہشت گردوں میں عبدالمنان اور عمران اختر شامل ہیں۔ دونوں کو نواحی گاؤں جلو سے گرفتار کیا گیا۔
گرفتار دہشت گردوں کا ہدف محرم الحرام میں جلوس کو نشانہ بنانا تھا۔ ملزمان سے بارودی مواد، ڈیٹو نیٹر، سیفٹی فیوز اور اسلحہ برآمد ہوا۔
سی ٹی ڈی کی جانب سے ملزمان سے مزید تحقیقات جاری ہیں اور ان کے ساتھیوں کے بارے میں بھی پوچھ گچھ کی جارہی ہے۔
دہشت گردوں کیخلاف تھانہ سی ٹی ڈی لاہور میں مقدمہ درج کرتے ہوئے انہیں مزید تفتیش کے لیے نامعلوم مقام پر منتقل کر دیا گیا ہے۔
