اسلام آباد (ڈیلی اردو) سابق وفاقی وزیر داخلہ اور پاکستان پیپلز پارٹی کے سینئر رہنما و سابق سینیٹر رحمٰن ملک کورونا سے انتقال کر گئے۔ وہ دو ہفتے سے زائد قبل علیل ہوئے، ان کا کورونا ٹیسٹ کیا گیا جو کہ مثبت آیا۔
رحمٰن ملک کا آکسیجن لیول کم ہونے کی وجہ سے انہیں اسلام آباد کے ہسپتال میں منتقل کیا گیا جہاں دوران علاج طبیعت زیادہ خراب ہونے پر انہیں وینٹی لیٹر پر لگا دیا گیا۔
دو سے زائد ہفتے وینٹی لیٹر پر رہنے کے بعد رحمٰن ملک منگل کو اپنے خالق حقیقی سے جا ملے۔
رحمٰن ملک کے انتقال کی تصدیق کرتے ہوئے ان کے ترجمان ریاض علی طوری نے کہا کہ ‘دکھ، درد اور غم ناقابل بیان ہیں، آج میں ہمیشہ کے لیے ایک عظیم دوست اور مہربان سرپرست سے ہمیشہ کے لیے محروم ہو گیا ہوں’۔
إِنَّا لِلَّٰهِ وَإِنَّا إِلَيْهِ رَاجِعُونَ
سابق وزیر داخلہ, پاکستان پیپلز پارٹی سینئر رہنما اور ملک کے نامور سیاستدان سینیٹر رحمان ملک انتقال کر گئے۔
دکھ، درد اور غم ناقابل بیان ہیں۔ آج میں ہمیشہ کے لیے ایک عظیم دوست اور مہربان سرپرست سے ہمیشہ کے لیے محروم ہو گیا ہوں۔— Riaz Ali Turi (@RiazToori) February 22, 2022
رحمٰن ملک کو گزشتہ ماہ جنوری میں کورونا وائرس کی تشخیص ہوئی تھی جس کے باعث ان کے پھیپھڑے شدید متاثر ہوگئے تھے جس سے انہیں سانس لینے میں دشواری کا سامنا تھا۔
فروری کے اوائل میں انہیں طبیعت بگڑنے پر انہیں اسلام آباد کے شفا انٹرنیشنل ہسپتال میں وینٹیلیٹر پر منتقل کیا گیا تھا، رحمٰن ملک نے سوگواروں میں بیوہ اور 2 بیٹے چھوڑے ہیں۔
حالات زندگی
سرکاری خبررساں ادارے اے پی پی کے مطابق سینیٹر رحمٰن ملک 12 دسمبر 1951 کو سیالکوٹ میں پیدا ہوئے، انہوں نے کراچی یونیورسٹی سے ایم ایس سی شماریات کی ڈگری حاصل کی، سیاست سے پہلے وہ ایف آئی اے کے سربراہ تھے۔
رحمٰن ملک بینظیر بھٹو شہید کے با اعتماد اور وفادار ساتھیوں میں سے تھے انہوں نے دہشتگردی کے خلاف جنگ میں بہت اہم اور بہادرانہ کردار ادا کیا تھا۔
وہ پیپلزپارٹی کے دور حکومت 2008ء سے 2013ء تک وفاقی وزیر داخلہ رہے اور بینظیر بھٹو کی شہادت کے وقت وہ ان کے چیف سیکیورٹی تھے، قبل ازیں وہ ایف آئی اے اور آئی بی میں ذمہ دار عہدوں پر فائز رہے جبکہ پیپلزپارٹی کے ٹکٹ پر 2 مرتبہ سینیٹر منتخب ہوئے۔
سابق وزیر داخلہ نے کئی کتب بھی تحریر کی تھیں جن میں مودی وار ڈاکٹرائن، داعش اور ٹاپ 100 انویسٹی گیشنز شامل ہیں۔
وفاقی تحقیقاتی ادارے (ایف آئی اے) میں ان کی خدمات کے صلے میں انہیں ستارہ شجاعت اور نشان امتیاز سے دیا گیا تھا۔
سینیٹر رحمٰن ملک کی وفات پر صدر مملکت، وزیراعظم، وزیر داخلہ، وزیراطلاعات، وزیرخارجہ کے علاوہ پیپلز پارٹی کی قیادت اور دیگر سیاسی و سماجی شخصیات نے تعزیت کا اظہار کیا ہے۔
دفتر وزیراعظم سے جاری بیان کے مطابق وزیرِ اعظم عمران خان نے ان کے انتقال پر اظہارِ افسوس کرتے ہوئے دعا کی کہ اللہ تعالی مرحوم کی مغفرت فرمائیں اور سوگواران کو صبرِ جمیل عطا کریں۔
یوان صدر کے پریس ونگ سے جاری بیان کے مطابق صدر مملکت نے رحمٰن ملک کی وفات پر گہرے رنج و غم کا اظہار کرتے ہوئے ان کے اہل خانہ سے ہمدردی کا اظہار کیا ہے،صدر مملکت نے مرحوم کے لیے دعائے مغفرت، لواحقین کے لیے صبر جمیل کی دعا بھی کی ۔
پاکستان پیپلز پارٹی کے شریک چیئرمین اور سابق صدر آصف علی زرداری نے رحمان ملک کے انتقال پر اظہار افسوس کرتے ہوئے کہا کہ رحمٰن ملک کی ملک کے لیے خدمات ناقابل فراموش ہیں، وہ ایک محنتی اور لائق وزیر داخلہ رہے تھے۔
وفاقی وزیر داخلہ شیخ رشید احمد نے تعزیت کا اظہار کرتے ہوئے کہا کہ سابق وزیر داخلہ و رہنما پیپلز پارٹی رحمٰن ملک کی رحلت کی خبر سن کر دکھ ہوا، خاندان کے غم میں برابر کے شریک ہیں۔
سابق وزیر داخلہ و رہنما پیپلز پارٹی رحمن ملک کے انتقال پر دکھ اورافسوس کااظہار کرتا ہوں
رحمن ملک کے لواحقین اور خاندان کے دیگر افراد کے کیساتھ اظہار تعزیت
رحمن ملک کی رحلت کی خبر سن کر دکھ ہوا۔ خاندان کے غم میں برابر کے شریک ہیں۔
1/2— Sheikh Rashid Ahmed (@ShkhRasheed) February 23, 2022
وفاقی وزیر اطلاعات و نشریات فواد چوہدری نے کہا کہ حدیبیہ کیس میں ان کی سربراہی میں تفتیش ہوئی اگرچہ اس پر انصاف ابھی تک نہیں ہوا لیکن اس تفتیش نے کرپشن کے ایسے ماڈرن طریقے ظاہر کیے کہ لوگ حیران رہ گئے، خدا انہیں غریق رحمت کرے۔
رحمنٰ ملک انتقال کرگئے إِنَّا لِلَّٰهِ وَإِنَّا إِلَيْهِ رَاجِعُونَ ، حدیبیہ کیس میں ان کی سربراہی میں تفتیش ہوئ اگرچہ اس پر انصاف ابھی تک نہیں ہوا لیکن اس تفتیش نے کرپشن کے ایسے ماڈرن طریقے ظاہر کئے کہ لوگ حیران رہ گئے، خدا غریق رحمت کرے
— Ch Fawad Hussain (@fawadchaudhry) February 23, 2022
سابق ڈپٹی چیئرمین سینیٹ سینیٹر سلیم مانڈوی والا نے ان کے انتقال پر گھرے دکھ اور افسوس کا اظہار کرتے ہوئے کہا کہ رحمٰن ملک کے انتقال کی افسوسناک خبر سن کر دلی صدمہ پہنچا ہے۔
انہوں نے کہا کہ رحمٰن ملک اچھے انسان اور بہترین سیاستدان تھے، اب کا انتقال ملکی سیاست کے لیے بڑا نقصان ہے۔
سلیم مانڈوی والا کا مزید کہنا تھا کہ رحمٰن ملک کے انتقال سے پیدا ہونے والا خلا کبھی پر نہیں ہو سکتا، ان کی پارٹی کے لیے خدمات کو ہمیشہ یاد رکھا جائے گا۔
سابق وزیر داخلہ رحمن ملک کے انتقال پہ دلی صدمہ ہوا- اللہ تعالی ان کی مغفرت فرمائے اور ان کے اہل خانہ کو صبر جمیل عطا فرمائے آمین! pic.twitter.com/rCiz3WL6Pw
— Ahsan Iqbal (@betterpakistan) February 22, 2022
دوسری جانب مسلم لیگ (ن) کے رہنما احسن اقبال نے رحمٰن ملک کے انتقال پر اظہارِ تعزیت کرتے ہوئے کہا کہ سابق وزیر داخلہ رحمن ملک کے انتقال پہ دلی صدمہ ہوا, اللہ تعالی ان کی مغفرت فرمائے اور ان کے اہل خانہ کو صبر جمیل عطا فرمائے۔
إِنَّا لِلَّٰهِ وَإِنَّا إِلَيْهِ رَاجِعُونَ
ہمارے دوست ، بھائ ، ساتھی اور ایک بہترین رہنما سینیٹر رحمان ملک کے انتقال کی خبر سُن کر شدید صدمہ پہنچا ہے پروردگار ان کے درجات بلند کرے اور خاندان کے افراد کو صبر عطا کرے۔ آمین— Syed Nasir Hussain Shah (@SyedNasirHShah) February 22, 2022
وزیر بلدیات سندھ ناصر حسین شاہ نے کہا کہ ہمارے دوست، بھائی، ساتھی اور ایک بہترین رہنما سینیٹر رحمٰن ملک کے انتقال کی خبر سُن کر شدید صدمہ پہنچا ہے، پروردگار ان کے درجات بلند کرے اور خاندان کے افراد کو صبر عطا کرے۔
