دمشق (ڈیلی اردو) اسرائیلی طیارے کے شام کے ہوائی اڈے پر میزائل داغے جس سے رن وے اور عمارت کو نقصان پہنچا تاہم کوئی جانی نقصان نہیں ہوا۔
شامی حکومت کے حمایت یافتہ اخبار الوطن کے مطابق اسرائیل نے دارالحکومت دمشق میں ایئرپورٹ پر میزائل حملہ کیا ہے۔ حملے میں ایک شخص زخمی ہوا جب کہ رن وے اور ہوائی اڈے کی عمارت کو نقصان پہنچا ہے۔
اخبار میں شائع ہونے والی رپورٹ میں کہا گیا ہے کہ شام کے فضائی دفاعی نظام نے بروقت ردعمل دیتے ہوئے کئی میزائلوں کو فضا میں ہی تباہ کردیا تاہم چند میزائل ہدف تک پہنچ گئے۔
حکومتی سطح پر ایئرپورٹ پر میزائل حملے سے متعلق کچھ نہیں بتایا گیا تاہم تمام پروازوں کو بغیر کوئی وجہ بتائے معطل کردیا گیا اور ایمبولینسوں کو ہوائی اڈے کی جانب جاتے ہوئے دیکھا جا سکتا ہے۔
شامی فوج کے ایک بیان میں بتایا گیا ہے کہ مقامی وقت کے مطابق صبح تقریباً 4 بجے (صبح 6 بجے پاکستانی وقت) ہونیوالے حملے میں کچھ املاک کو بھی نقصان پہنچا ہے۔
بیان میں کہا گیا ہےکہ زیادہ تر میزائلوں کو شامی فضائی دفاع نے اپنے اہداف تک پہنچنے سے پہلے ہی ناکارہ بنا دیا تھا۔
اسرائیل کی جانب سے فوری طور پر کوئی ردعمل سامنے نہیں آیا ہے۔
ادھر شام میں انسانی حقوق کی مانیٹرنگ کرنے والے برطانوی ادارے سیریئن آبزر ویٹری نے دعویٰ کیا ہے کہ اسرائیلی میزائلوں نے ایئرپورٹ کے نزدیک لبنان کی شیعہ عسکری تنظیم حزب اللہ کے اسلحہ ڈپو کو نشانہ بنایا۔
ادارے نے یہ دعویٰ بھی کیا کہ اسرائیلی حملے میں متعدد افراد زخمی ہوئے جن کی تعداد کی تصدیق نہیں ہوسکی تاہم ہسپتال میں 10 سے زائد زخمیوں کو لایا گیا ہے۔
رواں ہفتے شامی تنصیبات پر ہونیوالا یہ تیسرا اسرائیلی حملہ ہے۔
