اسلام آباد (ش ح ط) صوبہ خیبر پختونخوا کے قبائلی ضلع کرم میں پاک افغان سرحد سے متصل عوزگڑی میں نامعلوم مسلح افراد کی فائرنگ سے فرنٹیئر کور (ایف سی) کا ایک اہلکار ہلاک اور دوسرا زخمی ہو گیا ہے۔
قبائلی ضلع کرم میں پاک افغان سرحد سے متصل عوزگڑی میں سرحد پار سے فائرنگ میں فرنٹیئر کور (ایف سی) کا ایک اہلکار ہلاک جبکہ دوسرا زخمی ہو گیا۔ #Kurram #Pakistan @Natsecjeff
— Shabbir Hussain Turi (@ShabbirTuri) July 24, 2022
سرکاری ذرائع نے ڈیلی اردو کو بتایا کہ یہ حملہ ہفتہ کی شب اُس وقت ہوا جب نامعلوم مسلح افراد نے کرم کی ایف سی چیک پوسٹ پر فائرنگ کی جس سے وہاں پر تعینات لانس نائیک صابر علی موقع پر ہلاک ہوگیا جبکہ دوسرا اہلکار زخمی ہوا۔ زخمی کو ہسپتال منتقل کر دیا گیا ہے۔
لانس نائیک صابر علی کا تعلق کوہاٹ کے علاقے میٹھا خان سے ہے۔
مقامی ذرائع کا کہنا ہے کہ واقعے کے بعد سکیورٹی فورسز نے جائے وقوعہ اور اردگرد کے علاقوں میں سرچ آپریشن کا آغاز کردیا ہے۔ مقامی ذرائع کے مطابق حملہ آور فرار ہونے میں کامیاب ہوگئے۔
سرکاری سطح پر اس حملے کے حوالے سے کوئی بیان جاری نہیں کیا گیا ہے۔ نہ ہی ابھی تک کسی بھی گروہ نے اس حملے کی ذمہ داری قبول نہیں کی ہے۔
