اسلام آباد (ش ح ط) صوبہ خیبر پختونخوا کے ضلع کوہاٹ میں پولیس تھانے پر دہشت گردوں نے دستی بم سے حملہ کیا ہے۔
پولیس کے مطابق کوہاٹ پنڈی روڈ پر واقع تھانہ بلی ٹنگ پر نامعلوم دہشت گردوں نے دستی بم پھینکا جو تھانے کی صحن میں دھماکے سے پھٹ گیا، دستی بم کے اس حملے کے نتیجے میں پولیس سٹیشن میں موجود ایس ایچ او عبد الرؤف، کانسٹیبل مظفر حسین، کانسٹیبل مطیع اللہ، کانسٹیبل عتیق، کانسٹیبل اُسامہ اور تھانے آئے ہوئے دو مقامی شہری عارف اور سہیل خان زخمی ہوگئے. واقعے میں زخمی ہونے والے پولیس اہلکاروں اور دیگر افراد کو فوری طور پر ابتدائی طبی امداد کیلئے سول ہسپتال بلی ٹنگ اور کوہاٹ ڈویژنل ہیڈ کوارٹر ہسپتال منتقل کردیا گیا.
کوہاٹ میں تھانہ بلی ٹنگ پر دستی بم سے حملہ ایس ایچ او عبدالرؤف سمیت 7 پولیس اہلکار زخمی ہوگئے۔#Kohat #Pakistan @Natsecjeff
— Shabbir Hussain Turi (@ShabbirTuri) September 13, 2022
گرنیڈ حملے کی اطلاع پر پولیس کی نفری موقع پر پہنچ گئی، بم ڈسپوزل اسکواڈ کو بھی طلب کیا گیا۔
ذرائع کے مطابق پولیس اور دیگر متعلقہ اداروں کے اہلکاروں نے علاقے کو گھیرے میں لے کر سرچ آپریشن شروع کردیا ہے جب کہ جائے وقوع سے ثبوت و شواہد بھی اکھٹے کیے جا رہے ہیں۔
واقعے کے بعد شہر بھر کی سیکیورٹی ہائی الرٹ کردی گئی ہے اور پولیس نے اندرون و بیرون شہر مختلف مقامات پر اضافی ناکہ بندیاں قائم کرکے چیکنگ کا عمل بڑھا دیا ہے جبکہ پولیس کی موبائل، رائیڈر اور پیادہ گشت میں بھی اضافہ کردیا گیا ہے.
پولیس سٹیشن پر دہشتگردانہ حملے کا مقدمہ تھانہ سی ٹی ڈی کوہاٹ ڈویژن میں نامعلوم افراد کے خلاف درج کرلیا گیا ہے اور واقعے کی تحقیقات شروع کردی گئی ہیں.