صوابی (ڈیلی اردو) صوبہ خیبر پختونخواہ کے ضلع صوابی میں پولیس نے دہشت گردی کی کوشش ناکام بنا دی، دہشت گردوں نے پولیس کو دیکھتے ہی فائرنگ کی اور بعد ازاں خود کو دھماکے سے اڑا دیا۔
صوابی میں سی ٹی ڈی آپریشن کے دوران دو خودکش حملہ آوروں نے خود کو دھماکے سے اُڑا لیا جبکہ ایک دہشت گرد کو گرفتار کرکے نامعلوم مقام پر منتقل کردیا گیا ہے۔ #Swabi #Pakistan
— Shabbir Hussain Turi (@ShabbirTuri) January 30, 2023
تفصیلات کے مطابق صوابی کے علاقے ہنڈ میں پولیس اور دہشت گردوں کے درمیان فائرنگ کا تبادلہ ہوا۔
پولیس کا کہنا ہے کہ دہشت گردوں نے پولیس کو دیکھتے ہی فائرنگ کی، بعد ازاں دہشت گردوں نے خود کو دھماکے سے اڑا دیا۔
ضلعی پولیس کی جانب سے جاری ایک بیان کے مطابق آج علی الصبح انٹیلی ایجنسیوں سے شرپسندوں کی موجودگی کی بابت خفیہ اطلاع ملی جس پر ڈی پی او صوابی کیپٹن (ر) نجم الحسنین کی زیرقیادت پولیس کی بھاری نفری نے موقع پر پہنچ کر علاقے کو گھیرے میں لے کر آپریشن شروع کر دیا۔
بیان کے مطابق شرپسندوں کو بذریعہ لاوڈ سپیکر سرنڈر ہونے کا کہا گیا تاہم انہوں نے پولیس پارٹی پر اندھادھند فائرنگ کھول دی جبکہ پولیس نے بھی حق حفاظت خود اختیاری کے تحت جوابی فائرنگ کی۔
جوابی فائرنگ کے نتیجے میں ایک دہشت گرد کو گرفتار کرلیا گیا جبکہ دو دہشت گردوں نے زخمی خالت میں خود کو ہینڈ گرینیڈ سے اُڑا دیا۔
بیان میں کہا گا کہ آپریشن کامیابی سے مکمل ہوا جبکہ اس دوران پولیس محفوظ رہی، واقعہ کے بعد ضلع بھر میں سیکیورٹی ہائی الرٹ جبکہ جگہ جگہ سخت چیکنگ جاری ہے۔
