راولپنڈی (ڈیلی اردو) سیکیورٹی فورسز کی صوبہ خیبر پختونخوا کے قبائلی ضلع شمالی وزیرستان کے علاقے میران شاہ میں کامیاب کارروائی کے دوران دہشت گرد کمانڈر مہتاب عرف لالہ سمیت 7 دہشت گردوں کو گرفتار کرلیا گیا ہے۔
پاکستانی فوج کے شعبہ تعلقات عامہ آئی ایس پی آر کے مطابق سیکیورٹی فورسز نے شمالی وزیرستان کے علاقے میران شاہ میں دہشت گردوں کی موجودگی کی خفیہ اطلاع پر مبنی آپریشن کیا، جس کے نتیجے میں حافظ گل بہادر گروپ سے تعلق رکھنے والے دہشتگرد کمانڈر مہتاب عرف لالہ سمیت 7 دہشتگرد گرفتار کر لیے گئے۔
گرفتار دہشت گرد سیکیورٹی فورسز پر حملوں سمیت بےگناہ شہریوں کے قتل اور دہشت گردی کی متعدد کارروائیوں میں ملوث تھے۔
آئی ایس پی آر کا کہنا ہے کہ علاقے کے مقامی لوگوں نے سیکیورٹی فورسز کی کارروائی کو سراہا اور دہشت گردی کی لعنت کو ختم کرنے میں اپنے تعاون کا یقین دلایا ہے۔
