اسلام آباد (ش ح ط) صوبہ خیبرپختونخوا کے قبائلی ضلع ٹانک میں سکیورٹی فورسز اور پولیس کی مشترکہ آپریشن کے دوران چار انتہائی مطلوب دہشت گرد ہلاک ہوگئے۔ پولیس کے مطابق گزشتہ رات تھانہ شہید مرید اکبر کی حدود چیسن کچھ میں پولیس اور سیکیورٹی فورسز نے مشترکہ آپریشن کیا۔
مشترکہ آپریشن میں سیکیورٹی فورسز اور دہشت گردوں کے مابین دوطرفہ فائرنگ کا تبادلہ ہوا جس کے نتیجے میں چار دہشت گرد ہلاک ہوگئے۔
دہشت گرد سیکیورٹی فورسز کے خلاف متعدد کاروائیوں میں ملوث تھے۔ دہشت گردوں کے قبضے سے بھاری اسلحہ و گولہ بارود برآمد ہوا ہے۔
واضح رہے کہ کالعدم تحریک طالبان (ٹی ٹی پی) کی جانب سے گزشتہ برس نومبر میں حکومت کے ساتھ جنگ بندی ختم کرنے کے اعلان کے بعد پاکستان میں خاص طور پر خیبرپختونخوا اور بلوچستان میں دہشت گردی کے واقعات میں اضافہ ہوا ہے۔
یاد رہے گزشتہ روز ڈیرہ اسماعیل خان کے علاقے درہ زندہ میں آئل اینڈ گیس کمپنی پر دہشت گردوں نے حملہ کیا تھا جس کے نتیجے میں ڈیوٹی پر مامور دو پولیس اہلکار ہلاک جبکہ تین اہلکار زخمی ہوئے تھے۔
گزشتہ روز 6 نومبر کو خیبرپختونخوا کے قبائلی ضلع خیبر کے علاقے وادی تیراہ میں سیکیورٹی فورسز کی کارروائی کے دوران دہشت گردوں سے فائرنگ کا تبادلہ ہوا، جس کے نتیجے میں لیفٹننٹ کرنل سمیت پاک فوج کے 4 اہلکار ہلاک اور 6 کمانڈوز زخمی ہوگئے۔
قبل ازیں 5 نومبر کی رات ڈیرہ اسماعیل خان میں 2 پولیس چوکیوں پر دہشت گردوں نے حملہ کیا تھا تاہم پولیس نے بروقت جوابی کارروائی کرتے ہوئے حملہ ناکام بنا دیا تھا۔
اس سے ایک روز قبل کلاچی تھانے کی حدود میں روڑی کے علاقے میں بھی ایک چوکی پر حملہ کیا گیا تھا، جس میں ایک اور کانسٹیبل زخمی ہوگیا تھا۔
4 نومبر کو پاکستان ائیرفورس ٹریننگ ایئربیس میانوالی پر دہشت گردوں نے حملے کی کوشش کی تھی جسے پاک فوج نے ناکام بنادیا اور کلیئرنس آپریشن میں تمام 9 دہشت گردوں کو ہلاک کردیا تھا۔ جبکہ پاکستان ائیر فورس کے 7 اہلکار بھی ہلاک ہوگئے تھے۔
3 نومبر کو بلوچستان کے ضلع گوادر میں سیکیورٹی فورسز کی گاڑی پر دہشت گردوں کے حملے میں پاک فوج کے 14 اہلکار ہلاک ہوگئے۔
قبل ازیں خیبر پختونخوا کے ضلع ڈیرہ اسماعیل خان میں ٹانک اڈہ کے قریب پولیس پر کیے گئے بم دھماکے میں 7 افراد ہلاک اور 31 افراد زخمی ہوگئے تھے۔
یکم نومبر کو بلوچستان میں ضلع ژوب کے علاقے سمبازا میں سیکیورٹی فورسز نے خفیہ اطلاع کی بنیاد پر کارروائی کرکے 6 دہشت گردوں کو ہلاک کردیا تھا۔
