کراچی (ڈیلی اردو) صوبہ سندھ کے دارالحکومت کراچی میں گرفتار مبینہ طور پر بھارتی خفیہ ایجنسی ریسرچ اینڈ اینالیسس ونگ (را) سے تربیت یافتہ 2 مشتبہ دہشت گردوں کو انسداد دہشت گردی منتظم عدالت نے 5 روزہ جسمانی ریمانڈ پر پولیس کے حوالے کردیا۔
نجی ٹی وی چینل ’ ڈان نیوز ’ کے مطابق کورنگی سے گرفتار را کے 2 دہشت گردوں شیخ ایوب عرف انصاری اور احسن رضا کو پولیس نے انسداد دہشتگردی کی منتظم عدالت میں پیش کیا۔
عدالت نے ملزمان کو جسمانی ریمانڈ پر پولیس کے حوالے کرکے آئندہ سماعت پر پیشرفت رپورٹ طلب کرلی۔
یاد رہے گزشتہ روز پولیس نے دعویٰ کیا تھا کہ اس نے مبینہ طور پر بھارتی خفیہ ایجنسی را سے تربیت یافتہ دو مشتبہ افراد کو گرفتار کر کے ان کے قبضے سے ہینڈ گرنیڈ سمیت اسلحہ برآمد کیا ہے۔
کورنگی کے سینئر سپرنٹنڈنٹ پولیس (ایس ایس پی) حسن سردار نیازی نے بتایا تھا کہ پولیس اور انٹیلی جنس ایجنسی نے کارروائی کرتے ہوئے شیخ محمد ایوب عرف ایوب انصاری اور احسن رضا کے نام کے دو مشتبہ افراد کو گرفتار کر لیا۔
اہلکار کا کہنا تھا کہ یہ کارروائی اس سے قبل گرفتار کیے گئے دو ’را‘ سے تربیت یافتہ ملزمان خاور حسین اور محمد جابر سے پوچھ گچھ کی روشنی میں کی گئی، ایس ایس پی نے شیخ ایوب کو ’را‘ کا ’ماسٹر مائنڈ ایجنٹ‘ قرار دیا۔
افسر نے دعویٰ کیا تھا کہ کراچی میں را کے ذریعے چلائے جانے والے ایک بہت بڑے نیٹ ورک کو توڑ دیا گیا ہے۔
ایوب انصاری مبینہ طور پر 1998 میں کراچی آیا تھا اور اپنی شناخت چھپا کر غیر قانونی طور پر پاکستان میں مقیم تھا۔
وہ ممبئی سے وزٹ ویزے پر کراچی آیا اور غیر قانونی طور پر پاکستانی پاسپورٹ اور شناختی کارڈ حاصل کیا۔
پولیس کے بیان میں کہا گیا تھا کہ تفصیلات کے مطابق را مختلف ممالک میں دہشت گردی کا منظم نیٹ ورک چلا رہی ہے۔
افسر نے بتایا تھا کہ ملزم ایوب انصاری ٹارگٹ کلنگ کو انجام دینے کے لیے اہداف کی جاسوسی کرتا تھا۔
