مقبوضہ کشمیر میں بھارتی فضائیہ کے اسکواڈرن لیڈر سمیت 2 افسر ہلاک، 2 زخمی

سری نگر (ویب ڈیسک) مقبوضہ کشمیر کے علاقے پُلواما میں سڑک حادثے میں بھارتی فضائیہ کے دو افسر ہلاک اور دوزخمی ہوگئے ہیں جب کہ مرنے والوں میں ایک اسکواڈرن لیڈر بھی شامل ہے۔

حادثہ مقبوضہ کشمیر کے علاقے پُلواما میں اس وقت پیش آیا جب بھارتی فضائیہ کے افسران جیپ میں سوار ملنگ پورہ کے علاقے سے گزررہے تھے، لاشوں اور زخمیوں کو فوجی اڈے میں واقع اسپتال منتقل کردیا گیا۔

سینئر پولیس افسر نے واقعے کی تصدیق کرتے ہوئے بتایا کہ حادثے میں دو افسر ہلاک اور دو زخمی ہوئے تاہم حادثے کی دیگر تفصیلات نہیں بتائی گئی اور نہ ہی یہ واضح ہوسکا کہ آخر اس وقت افسران کو غیر ضروری سفر کی ضرورت کیوں پیش آئی۔

جس مقام پر یہ حادثہ پیش آیا وہ بھارتی فضائیہ کے اڈے کے قریب ہی واقع ہے جب کہ واقعے کی اعلیٰ سطح پر تحقیقات اور تفتیش شروع کردی گئی ہے۔

اپنا تبصرہ بھیجیں