کوئٹہ (ڈیلی اردو) صوبہ بلوچستان کے صوبائی دارالحکومت کوئٹہ کے مغربی بائی پاس پر چیک پوسٹ کے قریب دھماکے کے نتیجے میں ایک اہلکار ہلاک اور 4 افراد زخمی ہوگئے۔
تفصیلات کے مطابق کوئٹہ میں مغربی بائی پاس پر سیکیورٹی فورسز کی چیک پوسٹ کے قریب دھماکے کے نتیجے میں ایک اہلکار ہلاک جب کہ دیگر 4 افراد زخمی ہوگئے، واقعہ کے بعد امدادی ٹیموں نے زخمیوں کو قریبی ہسپتال منتقل کیا جہاں انہیں طبی امداد فراہم کی جارہی ہے۔
ذرائع کا کہنا ہے کہ دھماکا موٹر سائیکل میں نصب بارودی مواد کے ذریعے کیا گیا ہے۔ دھماکے کے وقت ایف سی کا قافلہ قریب سے گزر رہا تھا۔
دھماکے کے بعد پولیس اور فورسز نے جائے وقوعہ کو گھیرے میں لیکر شواہد اکٹھے کرنے کا کام شروع کردیا ہے اور علاقے میں سرچ آپریشن بھی جاری ہے۔
