لاہور (اے ڈی شہزاد) کاؤنٹر ٹیررازم ڈیپارٹمنٹ (سی ٹی ڈی) نے صوبہ پنجاب کے ضلع نارووال میں کارروائی کرتے ہوئے کالعدم تنظیم کے دہشت گرد کو گرفتار کر لیا۔
ترجمان کے مطابق سی ٹی ڈی نے نارووال، مریدکے روڈ سے خفیہ اطلاع پر دہشت گرد شہزاد کو گرفتار کیا ہے۔ دہشتگرد ضلع نارووال میں ایک مذہبی اجتماع کو نشانہ بنانا چاہتا تھا۔
سی ٹی ڈی حکام کے مطابق گرفتار دہشت گرد کا تعلق کالعدم تنظیم سے ہے، جسے مزید تفتیش کیلئے نامعلوم مقام پر منتقل کردیا گیا ہے۔
ترجمان سی ٹی ڈی کے مطابق گرفتار دہشت گرد کے قبضے سے دھماکا خیز مواد، ڈیٹونیٹرز اور مذہبی مقامات کی تصاویر برآمد ہوئی ہیں۔
