کوئٹہ (ڈیلی اردو) صوبہ بلوچستان کے صوبائی دارالحکومت کوئٹہ کے علاقے ہزار گنجی میں ہونے والے ریموٹ کنٹرول دھماکے کے نتیجے میں 4 افراد زخمی ہوگئے جبکہ فرنٹیئر کور (ایف سی) کی گاڑی کو نقصان پہنچا۔
کاؤنٹر ٹیررازم ڈیپارٹمنٹ (سی ٹی ڈی) کے ترجمان نے بیان میں کہا کہ صبح 7 بجکر 40 منٹ پر سبزی مارکیٹ کے مرکزی گیٹ کے باہر ریموٹ کنٹرول دھماکا ہوا۔
انہوں نے کہا کہ دھماکے کے نتیجے میں 4 راہگیر زخمی ہوئے جبکہ ایف سی کی گاڑی کو معمولی نقصان پہنچا۔
ان کا کہنا تھا کہ دھماکے میں تقریباً ایک کلوگرام بارودی مواد استعمال ہوا جبکہ سی ٹی ڈی کی ٹیمیں جائے وقوع سے شواہد اکٹھے کر رہی ہیں۔
دھماکے سے قریبی عمارتوں کے شیشے بھی ٹوٹ گئے جبکہ سیکیورٹی فورسز نے جائے وقوع کو گھیرے میں لے کر تحقیقات کا آغاز کردیا۔
زخمیوں کو ریسکیو ورکرز نے بولان میڈیکل کمپلیکس منتقل کیا اور ہسپتال انتظامیہ کے مطابق 2 زخمیوں کی حالت تشویشناک ہے۔
واقعے کی مذمت کرتے ہوئے حکومت بلوچستان کے ترجمان لیاقت شاہوانی نے کہا کہ زخمیوں کو بہترین طبی سہولیات فراہم کرنے کے لیے ہسپتالوں میں ایمرجنسی نافذ کردی گئی ہے۔
ھزار گنجی دھماکے کی شدید الفاظ میں مذمت کرتا ہوں۔
زخمیوں کی بہترین نگہداشت کیلئے ہسپتالوں میں ایمرجنسی نافذ کردی گئی ہے۔
ملوث افراد کو گرفتار کرکے انصاف کے کٹہرے میں لایا جائے گا۔
زخمیوں کی شفایابی کیلئے دعاگو ہیں— Liaquat Shahwani (@LiaquatShahwani) July 26, 2021
انہوں نے کہا کہ ‘واقعے کے ذمہ داروں کو گرفتار کرکے انصاف کے کٹہرے میں لایا جائے گا’۔
واضح رہے کہ صوبہ بلوچستان کئی برسوں سے بدامنی کا شکار ہے اور یہاں اکثر سیکیورٹی فورسز پر حملے، دھماکے سمیت تخریب کاری کے مختلف واقعات رونما ہوتے رہتے ہیں۔
یکم جولائی کو کوئٹہ کے ایئرپورٹ روڈ پر موٹرسائیکل دھماکے میں 6 سیکیورٹی اہلکار زخمی ہوگئے تھے۔
دھماکے میں آرمی کے قافلے کو نشانہ بنایا گیا تھا۔
انسپکٹر جنرل (آئی جی) بلوچستان محمد طاہر رائے نے کہا تھا کہ ریموٹ کنٹرول بم موٹرسائیکل میں نصب کیا گیا تھا۔
