راولپنڈی (ک م) صوبہ خیبر پختونخواہ کے ضلع بنوں کے علاقے نورور میں سیکیورٹی فورسز کی خفیہ کارروائی کے دوران کالعدم تنظیم کے تین دہشت گرد مارے گئے۔
پاکستانی فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے گزشتہ رات دہشت گردوں کی موجودگی کی اطلاع پر خفیہ کارروائی کی۔
آپریشن کے دوران سیکورٹی فورسز اور دہشت گردوں کے درمیان شدید فائرنگ کا تبادلے میں تین دہشت گردوں کو جہنم واصل کردیا گیا۔
نمائندہ ڈیلی اردو کے مطابق ہلاک دہشت گردوں کا تعلق کالعدم تحریک طالبان پاکستان (ٹی ٹی پی) سے تھا اور ہلاک ہونے والے دہشت گردوں کی شناخت مولوی اسماعیل، ولی اللہ اور انعام اللہ کے نام سے ہوئی۔
آئی ایس پی آر نے کہا کہ دہشت گرد سکیورٹی فورسز کے خلاف دہشت گردی کی کارروائیوں اور معصوم شہریوں کے قتل میں سرگرم عمل تھے اور ان کے قبضے سے اسلحہ اور گولہ بارود بھی برآمد ہوا ہے۔
بیان میں کہا گیا کہ مقامی لوگوں نے آپریشن کو سراہا اور علاقے سے دہشت گردی کے خاتمے کے لیے اپنی مکمل حمایت کا اظہار کیا۔
اس سے قبل اتوار کے روز بلوچستان کے ضلع بولان کے علاقے مچھ میں سیکیورٹی فورسز نے خفیہ کارروائی کے دوران دو مبینہ دہشت گردوں کو ہلاک اور ایک کو گرفتار کر لیا۔
