83

غزہ میں متعدد مقامات پر اسرائیل کے فضائی حملے

غزہ (ڈیلی اردو) اسرائیل نے فلسطین کے علاقے غزہ کی پٹی پر متعدد مقامات پر وحشیانہ بمباری کی ہے تاہم اس بم باری کے نتیجے میں کسی قاسم کے جانی نقصان کی تصدیق نہیں ہوسکی۔

مرکز اطلاعات فلسطین کے مطابق اسرائیلی جنگی طیاروں نے دیر البلح اور خان یونس کے درمیان مزاحمتی مرکز پر بمباری کی۔ اسرائیلی فوج کی بمباری سے متعدد مکانات اور بجلی گھر کو نقصان پہنچا۔ بمباری سے کئی علاقوں کی بجلی معطل ہو گئی شہریوں میں خوف و ہراس پھیل گیا۔

دیر البلح میں اسرائیلی بمباری سے کھیتوں میں کھڑی فصلوں کو نقصان پہنچا۔

اس کے کچھ دیر بعد صہیونی فوج نے شمالی غزہ میں جبالیا کے مقام پر فلسطینی مزاحمتی مرکز پر بمباری کی۔

ادھر اسرائیل کےعبرانی ٹی وی چینل 13 کے مطابق غزہ کی پٹی سے اسرائیلی کالونیوں پر دو راکٹ داغے گئے تھے۔

اسرائیلی فوج کے ترجمان نے بھی غزہ سے دو راکٹ حملوں کی تصدیق کی ہے تاہم فلسطینی مزاحمت کاروں کی طرف سے کیے گئے حملوں میں کسی قسم کا جانی نقصان نہیں ہوا۔

اس خبر پر اپنی رائے کا اظہار کریں

اپنا تبصرہ بھیجیں