کراچی (ڈیلی اردو) صوبہ سندھ کے صوبائی دارالحکومت کراچی کے علاقے سائٹ ایریا میں نامعلوم موٹرسائیکل سوار ملزمان کی فائرنگ سے پولیس اہلکار ہلاک ہوگیا۔
پولیس کے مطابق رواں سال پولیس اہلکار کو ٹارگٹ کرنے کا یہ پہلا واقعہ ہے۔
پولیس کا کہنا ہے کہ خ اینٹی کارلفٹنگ سیل شریف آباد میں تعینات پولیس اہلکار کو سائٹ ایریا کے علاقے میٹرول نزد خٹک چوک کے قریب نشانہ بنایا گیا جس میں اسے 4 گولیاں لگیں۔
پولیس کے مطابق ملزمان کی فائرنگ سے پولیس اہلکار 31 سالہ شیراز خان موقع پر ہی ہلاک ہوگیا جب کہ ملزمان فرار ہوگئے۔
پولیس کے مطابق مقتول اہلکار شیراز خان فرنٹیر کالونی نمبر 3 میٹرول بلاک ڈی کا رہائشی تھا اورایس ایس یو سے ٹرانسفر ہوکر اے وی ایل سی شریف آباد میں تعینات ہوا تھا۔
پولیس نے بتایا کہ جائے وقوعہ سے نائن ایم ایم پستول کے چار خول ملے ہیں۔
پولیس حکام کے مطابق ہلاک اہلکار 2014 میں محکمہ سندھ پولیس میں بھرتی ہوا تھا۔
آئی جی سندھ مشتاق مہر نے ایس ایس پی کیماڑی سے واقعے کی مکمل تحقیقاتی رپورٹ طلب کرلی۔
دوسری جانب پولیس اہلکار کے قتل کا مقدمہ درج کرلیا گیا ہے۔
