سعودی عرب سے رہا ہونے والے 62 پاکستانی قیدی اسلام آباد پہنچ گئے

اسلام آباد (ڈیلی اردو) عیدالاضحیٰ سے صرف ایک روز قبل سعودی عرب سے حال ہی میں رہائی پاکر وطن پہنچنے والے پاکستانی قیدیوں کی اسلام آباد انٹرنیشنل ایئرپورٹ آمد کے موقع پر خوشی کا سماں بندھ گیا۔

اوورسیز پاکستانیز فائونڈیشن (او پی ایف) کے مینجنگ ڈائریکٹر عامر شیخ نے وزارت سمندر پار پاکستانیز و ترقی انسانی وسائل اور ادارہ کے سینئر افسران کے ہمراہ اسلام آباد ایئرپورٹ پر رہائی پانے والے پاکستانیوں کا استقبال کیا۔

پاکستانی قیدیوں کی آمد کے موقع پر اسلام آباد انٹرنیشنل ایئرپورٹ پاکستان زندہ باد کے نعروں سے گونج اٹھا اور انہوں نے موجودہ حکومت کی گرانقدر کوششوںکو زبردست انداز میں خراج تحسین پیش کیا۔

او پی ایف کے ترجمان کے مطابق ریاض میں پاکستانی سفارتخانہ، وزارت امور خارجہ اور وزارت سمندر پار پاکستانیز و ترقی انسانی وسائل کی مسلسل کوششوں کے باعث شاہ سلمان بن عبدالعزیز السعود کے احکامات پر سعودی حکام کی طرف سے ریاض میں منشیات سے متعلق معمولی مقدمات میں قید 63 پاکستانی قیدیوں کو رہائی دی ہے۔

انہوں نے اوپی ایف کی طرف سے قیدیوں کی وطن واپسی کیلئے کئے گئے انتظامات کا بھی حوالہ دیا تاکہ یہ قیدی عیدالاضحیٰ اپنے اہل خانہ کے ساتھ منا سکیں۔

ترجمان نے کہا کہ وزیراعظم عمران خان کے وژن کی روشنی میں تارکین وطن پاکستانیوں کو اولین ترجیح دی جارہی ہے۔ تارکین وطن اور ان کے اہل خانہ کو ہرممکن سہولت فراہم کرنے کیلئے تمام تر کوششں بروئے کار لائی جارہی ہیں۔ تارکین وطن پاکستانی بیرون ملک پاکستان کے سفیر ہوتے ہیں اور ملک کا اہم سرمایہ ہیں۔

ترجمان نے کہا کہ او پی ایف تارکین وطن پاکستانیوں اور ان کے اہل خانہ کو زندگی کے مختلف شعبوں میں خدمات فراہم کر رہی ہے اور ان کے مسائل اور مشکلات کے فوری ازالے کیلئے اقدامات اٹھا رہی ہے۔ اس موقع پر وطن واپس لوٹنے والے پاکستانیوں نے سعودی حکومت اور وزیراعظم عمران خان کا خصوصی طور پر شکریہ ادا کیا۔

دوسری طرف وزیراعظم عمران خان نے بھی سماجی رابطے کی ویب سائٹ ٹویٹر پر لکھا کہ یہ پاکستانی اپنے اہل خانہ کے ساتھ عید منا سکیں گے۔ بیرون ملک جیلوں میں پاکستانیوں کی مدد کرنا اور ان کی واپسی حکومت کی عوام سے وابستگی ہے۔ میری ہدایت پر فنڈز کا بندوبست کیا گیا اور خصوصی پرواز سے 62 قیدیوں کو واپس لایا گیا۔

مزید برآں وفاقی وزیر اطلاعات فواد چودھری نے اپنے ٹویٹ میں بیرون ملک سے وطن واپس آنے والے پاکستانیوں کی تصاویر بھی شیئر کیں۔

فواد چودھری کا کہنا ہے کہ کسی بھی حکومت نے بیرون ملک پاکستانیوں کیلئے اس احساس کا مظاہرہ نہیں کیا جو عمران خان کرتے ہیں، ‏اب تک کئی ہزار لوگ بیرون ملک مصائب کا شکار تھے، وطن واپس پہنچ گئے ہیں۔

ایک ٹویٹ میں انہوں نے کہا کہ کسی بھی حکومت نے بیرون ملک پاکستانیوں کیلئے اس احساس کا مظاہرہ نہیں کیا جو عمران خان کرتے ہیں۔ ان خاندانوں کی عید کی خوشیاں وزیر اعظم کی ذاتی کاوشوں کا ثمر ہیں۔ اب تک کئ ہزار لوگ جو بیرون ملک مصائب کا شکار تھے وطن واپس پہنچ چکے ہیں۔

اس خبر پر اپنی رائے کا اظہار کریں

اپنا تبصرہ بھیجیں