پاکستانی سرحد کے قریب فائرنگ سے سپاہِ پاسداران انقلاب کے 4 اہلکار ہلاک

کوئٹہ (ڈیلی اردو) پاکستان کی سرحد کے نزدیک مسلح افراد نے فائرنگ کر کے سپاہِ پاسداران انقلاب ایران کے چار اہلکاروں کو ہلاک کردیا۔

تفصیلات کے مطابق سیستان بلوچستان کے ضلع گونیک میں جمعے کی شب ایرانی فوجیوں اور مسلح افراد کے درمیان فائرنگ کا تبادلہ ہوا اور اس دوران مسلح افراد کی فائرنگ سے پاسداران انقلاب ایران کے 4 اہلکار ہلاک ہوگئے۔ واقعے کی مزید تفصیلات فراہم نہیں کی گئی ہیں۔

ایرانی میڈیا کے مطابق اس علاقے میں اکثر شدت پسندوں اور فورسز کے درمیان کے فائرنگ کا تبادلہ ہوتا رہتا ہے۔

سرکاری ٹیلی وژن کا مزید کہنا تھا کہ نامعلوم مسلح افراد فائرنگ کے بعد فرار ہوگئے جن کی تلاش میں چھاپہ مار کارروائی جاری ہے۔

سرحدی علاقوں سے موصول ہونے والی اطلاعات کے مطابق اس کارروائی کے پیچھے جیش العدل نامی تنظیم کا نام لیا جا رہا ہے۔ اس تنظیم کا نام پاک ایران سرحد کے قریب پیش آنے والے پہلے واقعات میں بھی لیا جاتا رہا ہے۔

اس خبر پر اپنی رائے کا اظہار کریں

اپنا تبصرہ بھیجیں