کراچی (ڈیلی اردو) سندھ پولیس نے بھارتی خفیہ ایجنسی کے پیروکار، سہولت کار اور دہشتگردی میں ملوث دو ملزمان کو گرفتار کرلیا۔
ایس ایس پی کیماڑی فدا حسین جانوری نے پریس کانفرنس کرتے ہوئے بتایا کہ ضلع کیماڑی پولیس نے حساس اداروں کے ہمراہ بڑی کاروائی کرتے ہوئے میرا ناکہ شیرشاہ سے بھارتی خفیہ ایجنسی کے پیروکار، سہولت کار اور دہشتگردی میں ملوث دو ملزمان کو گرفتار کیا ہے۔
ایس ایس پی کیماڑی نے بتایا کہ دونوں ملزمان کی شناخت ندیم علی عرف روپلو ولد خیر محمد مغیری اور وسیم علی آریجو ولد سکندر علی آریجو کے نام سے ہوئی ہے، اور گرفتاری کے وقت ان کے قبضہ سے دو عدد ہینڈ گرنیڈ ور ملک دشمن لٹریچر پر مبنی سی ڈی بر آمد ہوئی۔
فدا حسین جانوری کے مطابق ملزمان پڑوسی ملک بھارت کے آشیرباد سے سوشل میڈیا پر ملک دشمن پروپیگنڈہ اور دہشتگردانہ کاروائیوں کیلئے نئے لوگوں تیار کرنے اور کارروائیوں کی پلاننگ میں ملوث ہیں، ملزمان ریلوے ٹریک، کوئلہ کی ٹرین اور گیس پائپ کو نشانہ بنانے کی منصوبہ بندی سمیت قانون نافذ کرنے والے اداروں کے آفیسرز کی ریکی بھی کرتے رہے ہیں، جب کہ دونوں ملزمان دہشتگردوں کو پناہ دینے اور بھارتی خفیہ ایجنسی را کیلئے جاسوسی میں بھی ملوث ہیں۔
