پاراچنار (نمائندہ ڈیلی اردو) صوبہ خیبر پختونخوا کے قبائلی ضلع کرم میں پارا چنار اور صدہ پریس کلب کے صحافیوں نے ساجد کاظمی کی گرفتاری کے خلاف احتجاجی مظاہرہ کیا اور ساجد کاظمی کی فوری رہائی کا مطالبہ کیا۔
پریس کلب پارا چنار کے باہر احتجاجی مظاہرین سے خطاب کرتے ہوئے پاڑا چنار پریس کلب کے صدر علی افضل افضال، صدہ پریس کلب کے صدر اقبال حسین اقبال، رشید خان، ہدایت علی پاسدار، اسرار بنگش، عظمت علیزئی اور دیگر صحافیوں نے کہا کہ پارا چنار پریس کلب کے آفس سیکرٹری اور دنیا ٹی وی کے نمائندے کو مقامی انتظامیہ نے دو کمروں کا ایک فلیٹ الاٹ کیا تھا جس میں وہ اپنے کمسن بچوں کے ہمراہ مقیم تھے مگر اس کے باوجود ضلعی انتظامیہ نے دس روز سے صحافی ساجد کاظمی کو گرفتار کرکے جیل میں رکھا ہے جو کہ صحافیوں کے ساتھ ظلم اور نا انصافی ہے۔
صحافیوں نے ساجد کاظمی کی فوری رہائی کا مطالبہ کیا اور کہا کہ اگر سید ساجد کاظمی کو فوری رہا نہ کیا گیا تو ملک گیر احتجاجی تحریک چلائے جائے گی صحافیوں نے کہا کہ باقاعدہ الاٹمنٹ کے باوجود صحافی سے فلیٹ خالی کروانے کی کوشش قابل مذمت ہے جس کی جتنی مذمت کی جائے کم ہے۔
