پشاور (ڈیلی اردو) صوبہ خیبر پختونخوا کے صوبائی دارالحکومت پشاور کے علاقے سرکی گیٹ میں انٹیلی جنس بیورو (آئی بی) کی گاڑی پر نامعلوم افراد کی فائرنگ سے اسسٹنٹ سب انسپکٹر ہلاک جبکہ ایک افسر سمیت دو اہلکار زخمی ہوگئے۔
پولیس کے مطابق سرکی گیٹ میں حساس اداے (آئی بی) کی گاڑی پر نامعلوم افراد نے فائرنگ کردی، جس کے نتیجے میں اسسٹنٹ سب انسپکٹر نجیب اللہ موقع پر ہی ہلاک جبکہ اسسٹنٹ سب انسپکٹر امان اور ہیڈ کانسٹیبل جنید شدید زخمی ہوگئے۔
پولیس حکام کے مطابق سرکی گیٹ کے پاس کمرے میں حساس ادارے کے اہلکاروں کی رہائش تھی، اور گاڑی اہلکاروں کو چھوڑنے گئی تھی کہ دھاک لگائے نامعلوم دہشت گردوں نے گاڑی پر فائرنگ کردی، فائرنگ میں ایک افسر اور دو اہلکار شدید زخمی ہوگئے، واقعے کی اطلاع ملتے ہی پولیس اور ریسکیو کی ٹیمیں جائے وقوعہ پر پہنچ گئیں، اور زخمیوں کو لیڈی ریڈنگ ہسپتال منتقل کر دیا گیا، جبکہ جائے وقوعہ سے شواہد اکھٹے کرکے تحقیقات شروع کردی گئی ہے۔
