باجوڑ میں دھماکا، ایک ایف سی اہلکار ہلاک، دو زخمی

اسلام آباد (ش ح ط) صوبہ خیبر پختونخوا کے قبائلی ضلع باجوڑ میں ایک بم دھماکے میں فرنٹیئر کانسٹیبلری (ایف سی) کا ایک اہلکار ہلاک جبکہ دو زخمی ہو گئے۔

تفصیلات کے مطابق باجوڑ کی تحصیل خار کے علاقے یوسف آباد میں ریموٹ کنٹرول بم دھماکے میں ایف سی کو نشانہ بنایا گیا جس میں ایک اہلکار مجاہد شاہ ہلاک جبکہ دو زخمی ہو گئے۔

https://twitter.com/ShabbirTuri/status/1564495311334084610?t=a1clF-nKvn1kJwRkGFa_XA&s=19

واقعے کی اطلاع ملتے ہی پولیس موقع پر پہنچ گئی جبکہ ریسکیو اہلکاروں اور مقامی لوگوں نے لاش اور زخمیوں کو ہیڈکوارٹر ہسپتال خار منتقل کر دیا۔

پولیس نے حملہ آوروں کی گرفتاری کے لیے علاقے میں سرچ آپریشن شروع کر دیا۔

دوسری جانب عالمی شدت پسند تنظیم داعش خراسان نے حملے کی ذمہ داری قبول کرلی ہے۔