کیئو (ڈیلی اردو/بی بی سی) یوکرین کے مغربی شہر لیویو کے ایک گرجا گھر میں تسینگ شینگ-گوانگ کی ماں ایک تابوت میں رکھے اپنے بیٹے کی میت پر آخری نظر ڈالتی ہے۔
اس کے ساتھ دوسرے رشتہ دار اور متعدد یوکرینی بھی شامل ہو گئے ہیں جو ایک ایسے شخص کو خراج تحسین پیش کرنے کے خواہاں ہیں جو اپنے وطن سے ہزاروں لاکھوں میل دور ایک ایسے ملک میں جا کر لڑتا ہوا مر گیا جہاں وہ اس سے پہلے کبھی نہیں گیا تھا۔
اس کی ماں مزید کہتی ہے ’شینگ گوانگ میرے لڑکے، میں چاہتی ہوں کہ تم جان لو کہ تم بہت بہادر تھے۔ تم ہمیشہ میرے بچے رہو گے اور مجھے تم پر فخر ہے۔‘
مسٹر تسینگ یوکرین کی علاقائی سالمیت کے دفاع کے لیے تشکیل دی گئی افواج کے بین الاقوامی دستے کے ساتھ یوکرین کے مشرقی شہر لیمان میں لڑتے ہوئے جارح فوج کے ہاتھوں ہلاک ہو گئے تھے۔ وہ یوکرین میں لڑتے ہوئے مرنے والا پہلا تائیوانی تھا۔
ان کی موت کے بعد جاری کردہ ایک بیان میں تائیوان کی وزارت خارجہ نے کہا کہ مسٹر تسینگ نے ’یوکرین کی آزادی کی لڑائی میں اپنی جان دے دی تھی۔‘
ہزاروں کی تعداد میں غیر ملکی فوجی لڑنے کے لیے یوکرین گئے ہیں لیکن ان میں تائیوانیوں کی تعداد بہت کم ہے، جو شاید صرف دس ہے۔
لیکن روس کے حملے کی بازگشت نصف دنیا دور اس خود مختار جـزیرے میں کیوں سنائی دی ہے۔ چین اس خودمختار جزیرے تائیوان کو اپنی سرزمین کا حصہ قرار دیتا ہے اور کہتا ہے کہ اگر ضرورت پڑی تو وہ اسے طاقت کے ذریعے اس سے الحاق کرے گا۔ تاہم تائیوان خود کو چین سے الگ سرزمین سمجھتا ہے۔
اگست میں امریکی سیاست دان نینسی پیلوسی کے دورے کے بعد آبنائے تائیوان میں کشیدگی میں تیزی سے اضافہ ہوا، جس نے بیجنگ کو مشتعل کیا۔ چین نے اس دورے کا جواب جزیرے کے ارد گرد فوجی مشقوں کے ساتھ دیا۔
سیمی لِن جنہوں نے مسٹر تسینگ سے آن لائن دوستی کی تھی، کہا کہ مسٹر تسینگ کو خدشہ تھا کہ تائیوان بھی ایک دن یوکرین جیسے انجام سے دوچار ہونا ہے۔
سیمی لِن نے کہا کہ ’مجھے یاد ہے کہ اس نے اپنے دوستوں سے کہا تھا کہ جب وہ یوکرین کے لوگوں کو روسیوں کے ہاتھوں زیادتی اور قتل کر رہے تھے تو وہ برداشت نہیں کر سکتا تھا۔‘
مسٹر لن نے کہا کہ مسٹر تسینگ ’سب سے زیادہ اچھے لوگوں میں سے ایک‘ تھا جن سے وہ ملے تھے۔
تائیوان میں لازمی فوجی سروس ہے، جو اسے مکمل کرنے والوں کو یوکرین کے غیر ملکی لشکر میں شامل ہونے کا اہل بناتی ہے۔
28 سالہ جیک یاؤ بھی جانے کا فیصلہ کرنے والوں میں شامل تھے۔ وہ تین دن بعد یوکرین پہنچے جب صدر ولادیمیر زیلنسکی نے غیر ملکی رضاکاروں سے یوکرین کی لڑائی میں شامل ہونے کی اپیل کی تھی۔ وہ تائیوان کے دارالحکومت تائی پے سے پولینڈ اور پھر یوکرین کے دارالحکومت کیئو پہنچے۔
انہوں نے بی بی سی کو بتایا کہ میں گزشتہ سال سے ان حالات کو دیکھ رہا تھا، خاص طور پر جب روسیوں نے بہت سارے فوجی اور ٹینک یوکرین کی سرحد پر تعینات کردیے تھے۔ کسی کو یقین نہیں تھا کہ ایسا ہو گا۔‘
’تائیوان اور وہاں کے حالات بالکل ہمارے جیسے ہیں۔ میں سوچ رہا تھا کہ میں یوکرین کی حمایت کے لیے کیا کر سکتا ہوں۔‘
اس نے جارجین غیر ملکی دستے میں شمولیت اختیار کی اور اسے قریبی جنگی جاسوسی مشن کا کام سونپا گیا۔ جب وہ وہاں پہنچا تھا تو روسی اس وقت تک کیئو پر قبضہ کرنے کی کوشش کر رہا تھا۔
وہ دارالحکومت کے شمال میں واقع قصبے کا حوالہ دیتے ہوئے کہتا ہے کہ ’وہاں بم اور راکٹوں کے بہت حملے ہو رہے تھے کیونکہ روسی فوج قریبی علاقے بوچا تک پہنچ چکے تھے۔
’میرا ایک مشن تھا اور میں نے اپنے ساتھیوں کو ایک دھماکے میں ہلاک ہوتے دیکھا۔ تقریباً 50 میٹر دور، بم ان کے قریب پھٹا تھا۔‘
اپنے فارغ اوقات کے دوران، وہ اپنی یونٹ کے ارکان کے ساتھ تائیوان کے مسئلے پر بھی باتیں کرتا تھا۔
انہوں نے کہا کہ ’ان میں سے ایک ساتھی تائیوان میں دو سال سے رہ چکا تھا اور اسے حالات کا علم تھا۔ تائیوان اور یوکرین بالکل بھائیوں کی طرح ہیں، یہ 100 فیصد ایک جیسے ہیں۔ وہ مجھے کہہ رہے تھے کہ تم یہاں نہیں مر سکتے کیونکہ تمہیں واپس جا کر اپنے وطن کی حفاظت کرنی ہے۔‘
اب جبکہ مسٹر جیک یاؤ تائیوان سے واپس آکر اپنے کافی کے کاروبار میں واپس آچکے ہیں، باقی اب بھی وہیں ہیں۔
یوکرین کے ایک خیراتی ادارے کے لیے ایک حالیہ ویڈیو میں دو تائیوانیوں نے اپنے مقاصد کی وضاحت کی۔
تائیوان کا جھنڈا تھامے ہوئے وہ کہتے ہیں کہ ’ہمارے یوکرین آنے کی بنیادی وجہ یوکرینیوں کا دفاع کرنا ہے۔ ہمیں اس بات کا بھی ڈر ہے کہ اگر روس جیت گیا تو چین بھی تائیوان کے ساتھ یہی سلوک کرے گا۔ اس لیے ہم یوکرین آنے کے لیے تیار ہوئے تاکہ یہاں کے لوگوں کی حفاظت کے لیے اپنی جانیں اور آزادی قربان کر دیں۔‘
پھر بھیا تمام تائیوانی جو یوکرین گئے تھے ان کے ذہن میں جغرافیائی سیاست نہیں تھی۔ جون میں لی چنلِنگ نے بی بی سی چائینیز کو بتایا کہ وہ وہاں موجود ہیں کیونکہ وہ ایک ’یادگار زندگی‘ گزارنا چاہتے ہیں۔
اس نے مزید کہا کہ اگر تائیوان پر حملہ کیا گیا تو ان کی لڑنے کی آمادگی تائیوان کی حکومت اور امریکہ کے ردعمل پر منحصر ہوگی۔
امریکی صدر جو بائیڈن نے ایک بار پھر کہا ہے کہ چین کے حملے کی صورت میں امریکہ تائیوان کا دفاع کرے گا۔ تاہم واشنگٹن کی سرکاری پالیسی ’اسٹرٹیجک ابہام‘ میں سے ایک ہے۔ یہ تائیوان کا دفاع کرنے کا عہد ظاہر نہیں کرتی، بلکہ اس آپشن کو مسترد بھی نہیں کرتی۔
پچھلے مہینے مسٹر بائیڈن نے کہا تھا کہ انہیں یقین نہیں ہے کہ تائیوان پر چینی حملہ قریب ہے۔ اس کے بعد بالی میں 20 بڑی معیشتوں یعنی (G20) کے سربراہی اجلاس سے قبل چینی صدر شی جن پنگ کے ساتھ آمنے سامنے ملاقات کے بعد ہوئی۔
تائیوان پبلک اوپینین فورم کے پال ہوانگ کا کہنا ہے کہ تصادم کے امکان کے بارے میں تائیوان کے عام لوگوں کے خیالات ملے جلے ہیں۔
انہوں نے بی بی سی کو بتایا کہ ’دلچسپ بات یہ ہے کہ زیادہ لوگ اس بات کی نشاندہی کرتے ہیں کہ وہ پریشان نہیں ہیں۔‘
جیسا کہ ہم نے یوکرین میں دیکھا ہے کہ کتنے لوگ کسی خاص واقعے کے بارے میں فکر مند ہیں، اس کا اس واقعے کے ہونے کے امکان پر کوئی اثر نہیں پڑتا ہے، اور نہ ہی یہ تیاری کے بارے میں کچھ کہتا ہے۔‘
وہ کہتا ہے کہ تاہم زیادہ تر تائیوانیوں نے یہ نہیں سوچا تھا کہ یہ جزیرہ چین کے خلاف اتنی دیر تک مزاحمت نہیں کرسکے گا جتنی دیر تک یوکرین نے روس کے خلاف مزاحمت کی ہے۔
مسٹر تسینگ کی غمگین والدہ نے کہا کہ ان کے بیٹے کے یوکرین کے لیے دوسروں کے ساتھ مل کر لڑنے کے فیصلے نے انہیں ایک حد تک سکون پہنچایا ہے۔
وہ کہتی ہے کہ ’یہ جانتے ہوئے کہ، اپنی زندگی کے آخری لمحات میں، شینگ گوانگ بہادر جنگجوؤں کے ایک گروپ کے ساتھ مل کر لڑ رہا تھا، اور وہ ایک دوسرے کا ساتھ دیتے تھے اور زندگی اور موت میں ایک دوسرے کے ساتھ تھے، لیکن پھر بھی مجھے اس کے مرنے کی تکلیف بھی محسوس ہوتی ہے۔ بہرحال مجھے اس کی اس قربانی سے تسلی بھی ہوتی ہے۔‘
