میران شاہ (ڈیلی اردو) شمالی وزیرستان میں سیکیورٹی فورسز کی جانب سے خفیہ اطلاع پر کیے گئے آپریشنز کے دوران ایک اہم طالبان کمانڈر مارا گیا جبکہ دوسرے کو گرفتار کر لیا گیا، جو سیکورٹی فورسز کے خلاف خودکش حملوں میں ملوث تھا۔
سرکاری ذرائع کے مطابق سیکیورٹی فورسز نے ایک موٹرسائیکل اور 20 کلو گرام دھماکا خیز مواد بھی برآمد کیا ہے۔
ذرائع نے بتایا کہ سیکیورٹی فورسز نے میرانشاہ کے علاقے دیرونی میں کچھ دہشت گردوں کی موجودگی کی خفیہ اطلاع ملنے پر آپریشن شروع کیا گیا۔
مزید بتایا کہ سیکیورٹی فورسز اور دہشت گردوں کے درمیان فائرنگ کا تبادلہ ہوا، جس کے نتیجے میں طالبان کا ایک اہم کمانڈر مارا گیا جبکہ دیگر دو زخمی ہو گئے۔
ذرائع نے بتایا کہ خفیہ اطلاع پر دوسرا آپریشن میر علی کے علاقے حیدر خیل میں کیا گیا، جہاں سیکیورٹی فورسز نے خودکش حملوں میں ملوث ایک دہشت گرد کو گرفتار کیا۔
واضح رہے کہ 11 مارچ کو سیکیورٹی فورسز نے شمالی اور جنوبی وزیرستان میں خفیہ اطلاع کی بنیاد پر کی گئیں مختلف کارروائیوں میں 5 دہشت گردوں کو ہلاک کردیا تھا۔
