اسلام آباد (مانیٹرنگ ڈیسک) استنبول میں ریلی میں ہزاروں افراد نے شرکت کی اور مظاہرین نے ہاتھوں میں فلسطین اور مزاحمتی تحریک حماس کے پرچم اٹھا رکھے تھے— فوٹو: وی او اے
دنیا کے مختلف ممالک میں فلسطینیوں سے اظہاریکجہتی کیلئے مظاہروں کا سلسلہ جاری ہے۔
گزشتہ روز حماس کے اسرائیل پر منظم اور کامیاب حملے کے بعد فلسطینیوں نے مختلف علاقوں میں جشن منایا، غزہ میں اسرائیل کے تباہ شدہ ٹینک اور موبائل پر کھڑے ہوکر نوجوانوں نے نعرے لگائے۔
اس کے علاوہ ایران میں بھی حماس کے حملوں پر جشن کا سماں ہے، تہران میں فلسطین اسکوائر پر آتش بازی کی گئی جبکہ ترکیہ کے شہر استنبول میں بھی اظہار یکجہتی کی ریلی نکالی گئی۔
ریلی میں ہزاروں افراد نے شرکت کی اور مظاہرین نے ہاتھوں میں فلسطین اور مزاحمتی تحریک حماس کے پرچم اٹھا رکھے تھے۔
یمن کے دارالحکومت صنعا میں بھی فلسطینیوں کی حمایت میں ہزاروں افراد نکل آئے اور اسرائیل پر ہونے والے حملوں پر جشن منایا۔
یمن کے علاوہ عراق اور اردن سمیت دنیا کے کئی ملکوں میں حماس کی حمایت میں مظاہرے ہوئے ہیں۔
خیال رہے کہ گزشتہ روز فلسطین کی مزاحمتی تنظیم حماس نے اسرائیل پر زمین، فضا اور سمندر سے حملے کیے تھے اور اب بھی مختلف پر اسرائیلی فورسز سے جنگ جاری ہے۔
حماس کے حملوں میں اسرائیلوں کی ہلاکتوں میں اضافہ ہوگیا۔
اسرائیلی میڈیا کے مطابق حماس کے حملوں میں اسرائیلی فوج کے کرنل اور رھط شہر کے پولیس چیف سمیت 600 افراد مارے گئے ہیں۔
زخمیوں کی تعداد بھی 2 ہزار سے بڑھ چکی ہے اور درجنوں اسرائیلی فوجیوں اور شہریوں کو جنگجو یرغمال بناکر ساتھ لے گئے ہیں۔
