اسلام آباد + راولپنڈی (ڈیلی اردو/اے پی پی) آرمی چیف جنرل قمر جاوید باجوہ سے امریکی سینیٹر لنزے گراہم نے ملاقات کی جس میں علاقائی سیکیورٹی، افغان امن عمل پر تبادلہ خیال کیا گیا۔
آئی ایس پی آر کے مطابق امریکی سینیٹر لنزے گراہم نے جی ایچ کیو کا دورہ کیا جہاں انہوں نے آرمی چیف سے ملاقات کی۔
US Senator Lindsey Graham called on COAS. Regional security including Afghan Reconciliation Process was discussed. Visiting dignitary acknowledged Pakistan’s efforts towards regional peace and stability. pic.twitter.com/eJlQy0pcui
— DG ISPR (@OfficialDGISPR) December 16, 2019
امریکی سینیٹر نے خطے میں امن و استحکام کیلئے پاکستان کی کوششوں کی تعریف کی۔
قبل ازیں وزیراعظم عمران خان کی بحرین روانگی سے قبل امریکی سینیٹر نے وفد کے ہمراہ ان سے ملاقات کی تھی۔ اس ملاقات میں عمران خان نے علاوہ وزیر خارجہ شاہ محمود قریشی بھی موجود تھے۔
وزیر اعظم عمران خان سے امریکی سینٹر لنڈسے گراہم کی ملاقات
وزیر خارجہ شاہ محمود قریشی بھی ملاقات میں موجود۔ pic.twitter.com/G1w18qOuJq— Government of Pakistan (@GovtofPakistan) December 16, 2019
سرکاری نیوز ایجنسی اے پی پی کے مطابق وزیر اعظم نے امریکی سینیٹر پر زور دیا کہ وہ پاکستان اور امریکا کے درمیان تعلقات کو بالخصوص اقتصادی تعاون کو مزید مضبوط بنا تے ہوئے آگے بڑھانے کے لئے اپنا کردار ادا کریں۔
وزیر اعظم نے افغانستان میں امن و استحکام کی پاکستان کی ترقی کے لئے اہمیت کو اجاگر کرتے ہوئے کہا کہ پاکستان افغان امن و مصالحاتی عمل میں سہولت کاری کا کردار جاری رکھے گا۔
انہوں نے سینیٹر لنڈسے گراہم کو بھارتی جموں و کشمیر میں جاری مظالم کے بارے میں بھی آگاہ کیا اور بھارتی حکومت کی اقلیتوں کے خلاف امتیازی پالیسیوں کی جانب ان کی توجہ دلائی۔
وزیر اعظم نے خطے میں امن و استحکام کی صورتحال کو مزید خراب ہونے سے روکنے کے لئے امریکا کو اس جانب توجہ مرکوز رکھنے پر زور دیا۔ سینیٹر لنڈسے گراہم نے وزیر اعظم عمران خان کا پاکستان کی جانب سے افغان امن عمل کی مسلسل حمایت پر شکریہ ادا کیا۔
انہوں نے پاکستان اور امریکا کے درمیان وسیع دو طرفہ تعلقات بالخصوص اقتصادی تعاون اضافی مارکیٹ رسائی اور سرمایہ کاری کے فروغ کے لئے اپنی خواہش کا اعادہ کیا۔
انہوں نے ترقیاتی کاموں کے ذریعے قبائلی علاقہ جات کو قومی دھارے میں شامل کرنے کے حوالے سے پاکستان کی کامیابیوں کو سراہا اور سرحد پر باڑ لگانے کے اقدام کو سراہا۔ سینیٹر لنڈسے گراہم سینیٹ جوڈیشری کمیٹی کے چیئرمین اور امریکی سینیٹ میں آرمڈ سروسز، ایپروپری ایشنز اور بجٹ کمیٹیوں کے سینئر رکن ہیں۔
یاد رہے کہ یہ ان کا 2019ء میں پاکستان کا دوسرا دورہ ہے