نیویارک (ڈیلی اردو) دنیا بھر میں کورونا کا پھیلاؤ جاری ہے، مرنے والوں کی تعداد ایک لاکھ 84 ہزار 248 ہوگئی، 26 لاکھ 38 ہزار 909 افراد متاثر ہیں، عالمی ادارہ صحت نے خبردار کیا ہے کہ کورونا لمبے عرصے تک دنیا میں رہے گا۔
دنیا خطرناک وائرس کورونا کی لپیٹ میں، امریکا میں اموات کی مجموعی تعداد 45 ہزار 3463 جب کہ متاثرہ افراد کی تعداد 8 لاکھ 19 ہزار 175 ہوگئی ہے۔ امریکا کے بعد اٹلی میں سب سے زیادہ 25 ہزار ہلاکتیں ہوچکی ہیں۔
اسپین میں 21 ہزار 717 افراد لقمہ اجل بن گئے۔ اسپین میں ہنگامی حالت کے نفاذ کو مزید دو ہفتے تک بڑھایا جا سکتا ہے۔ فرانس میں بھی صورتحال تشویشناک ہو گئی جہاں کورونا سے 21 ہزار 340 افراد موت کے منہ میں جا چکے ہیں۔ برطانیہ میں کورونا سے 18100 افراد ہلاک ہو گئے۔
بھارت میں ہلاکتیں 681 ہو گئیں جبکہ 21 ہزار 317 افراد کورونا سے متاثر ہیں۔ سعودی عرب میں جاں بحق افراد کی تعداد 114 ہے۔
اس کے علاوہ ایران میں 5 ہزار 297، چین میں 4 ہزار 632، بیلجیم میں 6 ہزار افراد اپنی جانوں سے ہاتھ دھو چکے ہیں۔ برازیل میں بھی 2 ہزار 761 اور ترکی میں 2 ہزار 259 افراد انتقال کر چکے ہیں۔
جنوبی کوریا میں کورونا وائرس کے نئے متاثرین کی تعداد میں کمی آئی ہے اور گذشتہ روز صرف آٹھ نئے کیس سامنے آئے ہیں جن میں سے چار بیرون ملک سے منتقلی کئے گئے ہیں۔
تھائی لینڈ میں کورونا وائرس کا سب سے کم عمر مریض، ایک ماہ کا بچہ صحتیاب ہو گیا ہے۔ نیوزی لینڈ میں کورونا وائرس سے ہونے والی دو نئی ہلاکتوں کے بعد ملک میں اموات کی کل تعداد 16 ہو گئی ہے۔ جرمنی نے اپنی 16 ریاستوں میں ماسک کے استعمال کو لازمی قرار دے دیا۔
آج پاکستان میں کورونا وائرس سے مزید 13 افراد جاں بحق ہوگئے جس کے بعد ملک میں مہلک وبا سے ہلاکتوں کی مجموعی تعداد 220 ہوگئی جب کہ مزید نئے کیسز سامنے آنے کے بعد مصدقہ مریضوں کی تعداد 10503 تک پہنچ گئی ہے۔
عالمی ادارہ صحت کے سربراہ ڈاکٹر ٹیڈراس ادھانوم غیبریسس نے دنیا کو متنبہ کیا ہے کہ کورونا لمبے عرصے تک دنیا میں رہے گا۔ میڈیا بریفنگ کے دوران انہوں نے بتایا کہ دنیا کے بیشتر ممالک میں اس وبا میں اضافے کا رحجان دیکھنے میں آ رہا ہے جو تشویشناک ہے۔
