شمالی وزیرستان میں ایف سی گاڑی پر حملہ، پولیس افسر سمیت پانچ اہلکار ہلاک

اسلام آباد (ش ح ط) صوبہ خیبر پختونخوا کے قبائلی ضلع شمالی وزیرستان کی تحصیل میر علی کے علاقے شلپازئی کے قریب ایف سی کی گاڑی پر دہشتگردوں کے حملے میں پولیس افسر سمیت پانچ اہلکار ہلاک ہوگئے ہیں۔

سرکاری ذرائع کے مطابق شمالی وزیرستان کی تحصیل میر علی کے قریب دہشتگردوں نے ایف سی کی گاڑی پر حملہ کیا، دہشتگرد حملے میں ایک سب انسپکٹر سمیت پانچ سیکورٹی اہلکار ہلاک ہوگئے ہیں۔

ہلاک ہونے والوں میں چارسدہ کے رہائشی 35 سالہ حوالدار زاہد، خیبر کے رہائشی 28 سالہ لانس نائیک ولی، کرم کے رہائشی 28 سالہ لانس نائیک عبدالمجید، حوالدار اشفاق اور اسپن وام کے رہائشی 38 سالہ سب انسپکٹر جاوید شامل ہیں۔

ذرائع کے مطابق فیلڈر گاڑی بمع ایک ڈرائیور لاپتہ ہے جبکہ مذکورہ اہلکار علاقے شلپازئی بوبلی چیک پوسٹ پر ڈیوٹی دے رہے تھے۔ سیکیورٹی فورسز نے علاقے کو گھیرے میں لے کر سرچ آپریشن شروع کردیا ہے۔

فائرنگ کے بعد ملزمان فرار ہونے میں کامیاب ہوگئے۔

دوسری جانب کالعدم تحریک طالبان پاکستان (ٹی ٹی پی) نے حملے کی ذمہ داری قبول کرلی، ترجمان ٹی ٹی پی محمد خراسانی نے دعویٰ کیا ہے کہ حملے میں ایک صوبیدار سمیت پانچ اہلکار ہوگئے ہیں۔

اس خبر پر اپنی رائے کا اظہار کریں

اپنا تبصرہ بھیجیں