واشنگٹن (مانیٹرنگ ڈیسک) پیغمبراسلام ﷺ کے نواسے امام حسینؑ کی یزیدی فوج کے ہاتھوں شہادت کا غم، برطانیہ کے مختلف شہروں میں بھی مجالس عزا کا انعقاد کیا گیا۔
لندن، برمنگھم، مانچسٹر، بریڈفورڈ اور گلاسگو سمیت مختلف شہروں میں علما اور ذاکرین نے نبی ﷺ کے گھرانے کی کربلا میں شہادت کے واقعات بیان کیے، نوحہ خوانوں نے پُرسوز انداز میں یزیدی مظالم کی منظرکشی کی۔ غم میں ڈوبے مومنین نے ماتم کیا، فرانس اور بیلجیئم سمیت یورپ کے مختلف شہروں میں بھی سید الشہدا کی شہادت کے غم میں مجالس منعقد کی گئیں۔
امریکا کی مختلف ریاستوں کے امام بارگاہوں میں بھی ہزاروں عزادار جمع ہوئے، ذاکرین نے امام حسینؑ کے بیٹے حضرت علی اکبر کی شہادت کے واقعات خصوصی طور پر بیان کیے۔ ڈیلاس اور ہیوسٹن سمیت مختلف شہروں میں جلوس برآمد ہوئے، سیکڑوں عزاداروں نے زنجیر زنی کی۔
کینیڈا میں بھی عزاداری کا سلسلہ جاری ہے، امام حسینؑ کے بھائی حضرت عباس علمدارؑ کے پرچم کی شبیہہ پھولوں سے سجا کر برآمد کیا گیا، جلوس میں راستے بھر نوحہ خوانی اور ماتم حسینؑ ، شبیہہ تابوت و ذوالجناح بھی برآمد ہوا۔
دوسری جانب عراق میں پاکستان کے سفیر احمد امجد علی نے کہا ہے کہ ایک لاکھ سے زائد پاکستانی زائرین کربلا پہنچ گئے۔ پاکستان کے سفیر احمد امجد علی کے مطابق کربلا میں پاکستانی زائرین کیلئے خصوصی کیمپ آفس قائم کردیا گیا ہے۔ انہوں نے کہاکہ کیمپ آفس میں ڈاکٹرز اور ادویات موجود ہیں، سبیل بھی لگائی گئی ہے۔
سفیر پاکستان کا کہنا تھا کہ پاسپورٹ اور دستاویزات کی تصدیق بھی کیمپ آفس سے کی جاسکتی ہے، کیمپ آفس 7 سے 11 محرم تک کیلئے لگایا گیا ہے۔
احمد امجد علی نے کہا ہے کہ کربلا کیمپ آفس کا مقصد پاکستانی زائرین کو سہولیات مہیا کرنا ہے، کربلا کیمپ آفس وزارت خارجہ کی خصوصی ہدایت پر لگایا گیا ہے۔
