کراچی (ڈیلی اردو) سندھ رینجرز اور آئی ایس یو نے مشترکہ طور پر کارروائی کرتے ہوئے 2 انتہائی مطلوب دہشت گردوں کو گرفتار کرلیا، دونوں دہشت گردوں کا تعلق کالعدم تنظیم داعش سے ہے، گرفتار دہشت گردوں کے قبضے سے اسلحہ اور گولہ بارود بھی برآمد کرلیا گیا۔
تفصیلات کے مطابق رینجرز اور ایس آئی یو نے خفیہ معلومات پر کراچی کے علاقے گڈاپ میں کارروائی کرتے ہوئے کالعدم تنظیم داعش کے 2 انتہائی مطلوب دہشت گرد کو گرفتار کرلیا۔
ترجمان رینجرز کے مطابق گرفتار دہشتگرد میں فرمان اللہ عرف احتشام عرف علی عرف رحمت اللہ اور داوٴد عرف امیر صاحب شامل ہیں، ملزمان سے دستی بم اور اسلحہ و ایمونیشن بھی برآمد ہوا۔
ترجمان رینجرز کا مزید بتانا ہے کہ فرمان اللہ عرف احتشام عرف علی عرف رحمت اللہ داعش کا سرگرم رکن ہے، دہشتگرد قبائلی ضلع باجوڑ اور کراچی کے اندر دہشتگردی کی متعدد کارروائیوں میں مطلوب تھا۔
ترجمان کا کہنا تھا کہ دہشت گرد کا سرغنہ ساتھی سکندر 2020 میں کراچی سے گرفتار ہوا جبکہ یہ دہشت گرد افغانستان فرار ہو گیا تھا کچھ عرصہ قبل واپس کراچی آکر روپوش ہو گیا۔
ترجمان رینجرز کا کہنا تھا کہ گرفتار دہشتگرد کے ساتھی باجوڑ میں سیکیورٹی فورسز کیخلاف مقابلوں میں ہلاک ہو چکے، ان دہشتگرد کے خلاف تھانہ پی آئی بی کالونی میں سنگین نوعیت کے مقدمات درج ہیں۔
ترجمان نے مزید بتایا کہ ملزم داوٴد عرف امیر صاحب کا تعلق کالعدم تحریک طالبان پاکستان (ٹی ٹی پی) باجوڑ سے ہے، ملزم نے حال ہی میں تحریک طالبان پاکستان چھوڑ کر داعش میں شمولیت اختیار کی۔
ترجمان نے مزید بتایا کہ ملزم ساتھی فرمان اللہ عرف احتشام کے ساتھ مل کر گروپ کو دوبارہ منظم کر رہا تھا، گرفتار ملزمان کے ساتھیوں کی گرفتاری کے لئے چھاپے مارے جا رہے ہیں جبکہ ان ملزمان کو اسلحہ و ایمونیشن قانونی کارروائی کیلئے پولیس کے حوالے کردیا گیا۔ گرفتار دہشت گردوں سے تفتیش کی جارہی ہے اور اہم انکشافات متوقع ہیں۔
