لاہور (نمائندہ ڈیلی اردو) کاؤنٹر ٹیررزم ڈیپارٹمنٹ (سی ٹی ڈی) پنجاب نے دہشت گردی کا بڑا منصوبہ ناکام بناتے ہوئے آپریشنز کے دوران کالعدم تنظیموں سے تعلق رکھنے والے 10 دہشت گردوں کو گرفتار کر لیا ہے۔
ترجمان سی ٹی ڈی کے مطابق کاؤنٹر ٹیررزم ڈیپارٹمنٹ پنجاب نے دہشت گردی کے کسی بھی ناخوشگوار واقعہ سے نمٹنے کے لیے صوبہ بھر کے مختلف اضلاع میں 117خفیہ آپریشنز کئے۔ جن کے دوران 117مشتبہ افراد سے پوچھ گچھ کی گئی اور کالعدم تنظیموں سے تعلق رکھنے والے 10 مبینہ دہشت گردوں کو گرفتار کر کے ان کے قبضہ سے اسلحہ دھماکہ خیز و دیگر ممنوعی مواد برآمد کر لیا گیا۔
گرفتار ہونے والے دہشت گردوں میں گرفتار دہشت گردوں میں سید آغا، محمد نعمان، عطاءالرحمان، محمد اسامہ، صدیق، شاہ نواز، محمد سفیان سرور، محمد صفدر، قاسم خان اور عبدالحق شامل ہیں۔ جن کا تعلق کالعدم تنظیموں داعش، لشکرجھنگوی، تحریک طالبان پاکستان، القاعدہ اور بریگیڈ 313 سے ہے۔ ان دہشت گردوں کی گرفتاری سرگودھا، بہاولپور، لاہور اور رحیم یار خان انٹیلی جنس بیسڈ آپریشن کے دوران عمل میں لائی گئی۔
مبینہ دہشت گردوں کے قبضے سے آئی ای ڈی بم 2، ہینڈ گرنیڈ، ڈیٹونیٹرز 3، حفاظتی فیوز تار 11 فٹ، ممنوعہ کتابیں 4، کالعدم تنظیم کے 95 پمفلٹس، 114 سٹیکرز، رسید بک 1 اور 26225 روپے نقدی برآمد کی گئی ہے۔
دہشت گردوں نے تخریب کاری کا منصوبہ بنا رکھا تھا اور وہ دہشتگردانہ کارروائیوں میں اہم تنصیبات کو ٹارگٹ کرنا چاہتے تھے۔ دہشت گردوں کے خلاف 8 ایف آئی آر درج کر کے تفتیش کے لیے ان کو نامعلوم مقام پر منتقل کر دیا گیا ہے۔
