اسلام آباد (ش ح ط) صوبہ خیبر پختونخوا کے قبائلی ضلع شمالی وزیرستان کی تحصیل غلام خان میں سیکیورٹی فورسز اور مبینہ دہشت گردوں کے درمیان پیر کو ہونے والی جھڑپ میں چار عسکریت پسند اور کیپٹن سمیت پانچ سیکیورٹی اہلکار ہلاک ہوگئے ہیں۔
شمالی وزیرستان کے علاقے غلام خان میں سیکیورٹی فورسز اور مسلح افراد میں جھڑپ، کیپٹن سمیت 4 سیکیورٹی اہلکار ہلاک جبکہ 6 اہلکار زخمی ہوگئے۔ جوابی کارروائی میں ایک حملہ آور ہلاک، 3 زخمیوں کو گرفتار کر لیا گیا۔#NorthWaziristan #Pakistan @Natsecjeff
— Shabbir Hussain Turi (@ShabbirTuri) September 5, 2022
سرکاری ذرائع کے مطابق سیکیورٹی فورسز نے غلام خان کے علاقے شیروانگی پال میں عسکریت پسندوں کے کیمپ اور ٹھکانے کی موجودگی کی اطلاع پر انٹیلی جنس بیس آپریشن کیا۔
ذرائع کے مطابق عسکریت پسندوں نے سیکیورٹی فورسز پر فائرنگ کی اور مزاحمت کی گئی جس سے کیپٹن ولی وزیر سمیت پانچ سیکیورٹی اہلکار ہلاک اور پانچ یا چھ اہلکار زخمی ہو گئے۔ سیکیورٹی فورسز کی جوابی فائرنگ سے چار مبینہ دہشت گرد ہلاک ہوئے ہیں جن کی شناخت ظاہر نہیں کی گئی ہے۔ جبکہ تین حملہ آوروں کو زخمی حالت میں گرفتار کرلیا گیا ہے۔
ابھی تک کسی بھی گروپ نے حملے کی ذمے داری قبول نہیں کی ہے۔
پاکستانی فوج کے شعبہ تعلقاتِ عامہ (آئی ایس پی آر) کے مطابق فائرنگ کے تبادلے کے دوران 4 دہشت گرد مارے گئے۔
بیان میں بتایا گیا کہ ہلاک دہشت گردوں کے زیر قبضہ اسلحہ اور بارود بھی برآمد کرلیا گیا۔
کارروائی کے حوالے سے مزید بتایا گیا کہ مارے گئے دہشت گرد سیکیورٹی فورسز کے خلاف سرگرمیوں اور معصوم شہریوں کے خلاف کارروائیوں میں بدستور ملوث رہے تھے۔